వర్గం: Audio Lectures

వాలెంటైన్స్ డే (ప్రేమికుల రోజు) – Valentine’s Day – ఫిబ్రవరి 14
వక్త: ముహమ్మద్ నసీరుద్దీన్ జామి’ఈ (హఫిజహుల్లాహ్)
https://youtu.be/AdEFp1q0biM [43 నిముషాలు]
ఇక్కడ వినండి లేదా డౌన్లోడ్ చేసుకోండి (mp3)

ఈ ప్రసంగంలో వక్త ప్రేమికుల రోజు (వాలెంటైన్స్ డే) జరుపుకోవడం వెనుక ఉన్న వాస్తవాలను మరియు ఇస్లాం ధర్మం ప్రకారం దాని నిషిద్ధతను వివరిస్తున్నారు. ఫిబ్రవరి 14న జరుపుకునే ఈ పండుగ రోమన్ల కాలం నాటి విగ్రహారాధన మరియు క్రైస్తవ మతానికి చెందిన సెయింట్ వాలెంటైన్ చరిత్రతో ముడిపడి ఉందని, ఇది ఇస్లాం యొక్క ఏకేశ్వరోపాసన (తౌహీద్) భావనలకు విరుద్ధమని తెలిపారు. “ప్రేమ” అనే పేరుతో నేటి యువత అశ్లీలత, వ్యభిచారం మరియు సిగ్గులేనితనానికి అలవాటు పడుతున్నారని ఆవేదన వ్యక్తం చేశారు. షైతాన్ ఆదం (అలైహిస్సలాం) మరియు హవ్వా (అలైహిస్సలాం) లను మోసగించి వారి వస్త్రాలను తొలగించినట్లే, నేడు వాలెంటైన్స్ డే పేరుతో యువతలో సిగ్గు (హయా)ను చంపి వారిని పాపాల వైపు నడిపిస్తున్నాడని హెచ్చరించారు. నిజమైన ప్రేమ అల్లాహ్ మరియు ఆయన ప్రవక్త పట్ల ఉండాలని, తల్లిదండ్రులు తమ పిల్లల బాధ్యతను గుర్తించి వారిని ఇలాంటి పాశ్చాత్య సంస్కృతుల నుండి మరియు నరకాగ్ని నుండి కాపాడుకోవాలని సూచించారు.

---

الْحَمْدُ لِلَّهِ رَبِّ الْعَالَمِينَ وَالصَّلَاةُ وَالسَّلَامُ عَلَى سَيِّدِ الْمُرْسَلِينَ نَبِيِّنَا مُحَمَّدٍ وَعَلَى آلِهِ وَصَحْبِهِ أَجْمَعِينَ، أَمَّا بَعْدُ
[అల్హమ్దు లిల్లాహి రబ్బిల్ ఆలమీన్ వస్సలాతు వస్సలాము అలా సయ్యిదిల్ ముర్సలీన్ నబియ్యినా ముహమ్మదిన్ వ అలా ఆలిహి వ సహ్బిహి అజ్మయీన్, అమ్మ బాద్]
సర్వలోకాల ప్రభువైన అల్లాహ్ కు సకల స్తోత్రాలు మరియు ప్రవక్తల నాయకులు, మన ప్రవక్త ముహమ్మద్ సల్లల్లాహు అలైహి వసల్లం పై మరియు వారి కుటుంబం పై, వారి సహచరులందరి పై అల్లాహ్ యొక్క కారుణ్యం మరియు శాంతి కురియుగాక. ఆ తరువాత.

أَعُوذُ بِاللَّهِ السَّمِيعِ الْعَلِيمِ مِنَ الشَّيْطَانِ الرَّجِيمِ
[అవూజు బిల్ల్లాహిస్ సమీఇల్ అలీమి మినష్ షైతానిర్ రజీమ్]

إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ ۚ وَاللَّهُ يَعْلَمُ وَأَنتُمْ لَا تَعْلَمُونَ
[ఇన్నల్లజీన యుహిబ్బూన అన్ తషీఅల్ ఫాహిషతు ఫిల్ల్దజీన ఆమనూ లహుమ్ అజాబున్ అలీమున్ ఫిద్దున్యా వల్ ఆఖిరతి వల్లాహు యలము వ అన్తుమ్ లా తలమూన్]
నిశ్చయంగా ఎవరైతే విశ్వాసులలో అశ్లీలత వ్యాపించాలని కోరుకుంటారో వారికి ఇహలోకంలోనూ, పరలోకంలోనూ వ్యధాభరితమైన శిక్ష పడుతుంది. అల్లాహ్‌కు (అన్నీ) తెలుసు. కాని మీకు తెలియదు. (24:19)

సోదర మహాశయులారా! 2016 ఫిబ్రవరి నెల యొక్క ఏడవ తారీఖు ఈ రోజు. వచ్చే ఆదివారం వరకు ప్రపంచంలో మహా అపరాధాలు, ఎన్నో రకాల పాపాలు, అశ్లీలత ఇంకా ఎన్నో రకాల చెడులు విచ్చలవిడిగా జరగనున్నాయి. అంటే ప్రతి సంవత్సరం 14 ఫిబ్రవరి (14th February) ఆ దినాన్ని ‘వాలెంటైన్ డే’ అని గానీ, అరబ్బీలో ‘ఈద్-ఉల్-హుబ్‘ అని, ఉర్దూలో ‘యౌమ్-ఎ-ఆషికా‘ అని మరియు సామాన్యంగా తెలుగులో పేపర్లలో ఎక్కువ శాతం వాలెంటైన్ డే తో పాటు ‘ప్రేమికుల రోజు’ అని మనం చూస్తూ, వింటూ వస్తున్నాము.

అయితే మహాశయులారా! ఈ వాలెంటైన్ డే దీని యొక్క వాస్తవికత ఏమిటి? ముస్లింలు, ముస్లిం సమాజంలో ఉన్నవారు ప్రత్యేకంగా మరియు సామాన్యంగా ఏ మనిషి అయినా ఈ రోజుల్లో ప్రేమికుల రోజు అనే పేరుతో జరుగుతున్న సంబరాలు అని దానికి పేరు పెట్టండి, ఉత్సవం అని పేరు పెట్టండి లేక ఇంకా ఏ పేరు పెట్టుకున్నా గానీ, అందులో పాల్గొనడం లేదా తమ సంతానం మగపిల్లలైనా, ఆడపిల్లలైనా వారికి అనుమతి ఇవ్వడం, అందులో పాల్గొనడానికి, ఇది మనకు ఎంతవరకు సమంజసం? దీని గురించి కొన్ని నిజాలు, కొన్ని సత్యాలు మనం వినే ప్రయత్నం చేద్దాము.

అయితే ఈ విషయంలో నేను నా యొక్క ఈ రోజు టాపిక్ ను, శీర్షికను కొన్ని భాగాలుగా విభజించాను. ముందు మనం ఈ వాలెంటైన్ డే దీని యొక్క చారిత్రక వాస్తవికత ఏమిటి? దాన్ని తెలుసుకునే ప్రయత్నం చేద్దాము. ఆ పేరు మీద ఈ రోజుల్లో జరుగుతున్నది ఏమిటి? అది రెండో భాగంలో తెలుసుకునే ప్రయత్నం చేద్దాము. మూడో భాగంలో ప్రేమ యొక్క వాస్తవికత ఏమిటి? నాలుగో భాగంలో ప్రేమ అనే పేరు మీద ఈ రోజుల్లో మన యువకులు, యువతులు ఎలాంటి పాపాలకు, ఘోరమైన, వారు తమ వేడి రక్తంలో భవిష్యత్తు గురించి ఏమాత్రం దూరపు ఆలోచన లేకుండా ఏ కార్యాలైతే చేయబోతున్నారో అందులో ఉన్నటువంటి నష్టాలు ఏమిటో కొన్ని వారికి మనం తెలియజేద్దాము. అలాంటి వాటితో మనం దూరం ఉండడానికి ఏ సాధనాలు అవసరము అవి కూడా మనం కొంచెం చర్చించుకునే ప్రయత్నం చేద్దాము. కానీ సోదరులారా! గంట, గంటన్నర, రెండు గంటల వరకు మనం మాట్లాడుకుంటూ పోయినా ఈ టాపిక్ సమాప్తం కాదు. కానీ సాధ్యమైనంత వరకు 30 నుండి 40 నిమిషాల లోపుగా ఈ విషయాలు తెలుసుకునే ప్రయత్నం చేద్దాము.

వాలెంటైన్ డే – చారిత్రక నేపథ్యం

సోదరులారా! ఈ వాలెంటైన్ డే అన్నది ఎక్కడి నుండి వచ్చింది? ఎప్పటి నుండి వచ్చింది? అనే చరిత్రను, చరిత్ర పుటల్లోకి వెళ్లి తెలుసుకుంటే చాలా భిన్నమైన విషయాలు మనకు కానవస్తున్నాయి. దానికి ఒకటి కాదు, రెండు కాదు, మూడు కాదు, మరికొందరు నాలుగు, నాలుగు కంటే ఎక్కువ కారణాలు కూడా దానికి, దాని గురించి చెప్పి ఉన్నారు. వాటన్నిటిని సమకూర్చిన తర్వాత అందులో నుండి నేను తీసినటువంటి ఒక రిజల్ట్ ఏమిటంటే:

రోమన్లు చాలా పాత కాలంలో, అంటే ఇంచుమించు 2000 సంవత్సరాలకు ముందు కూడా, అప్పట్నుండి వారు విగ్రహారాధకులు. వారు చలికాలం సమాప్తం అవ్వడానికి వచ్చి, అక్కడి నుండి మరో కాలం మొదలయ్యే సందర్భంలో రెండు రకాల లేక రెండు ఉద్దేశాలతో పండుగ అని, ఉత్సవం అని వారు కొన్ని సంబరాలు జరుపుకునేవారు. ఈ 14 ఫిబ్రవరి తర్వాత నుండి మంచి పంటలు పండుతాయని, ఆ పంటలు పండించే విషయంలో వారు ఒక ఆనాటి కాలంలో ఏదో ఒక దేవీ దేవతను వారు పూజించేవారు. అయితే ఇది వారికి ఆ దేవతల పట్ల ప్రేమ ఉండి, ఆ ప్రేమలో ఆ దేవత కారణంగా మంచి పంటలు ఈ రోజుల్లో పండటం మొదలవుతాయి అనే ఉద్దేశంతో ఇది జరుపుకునేవారు.

ఇంకా మరికొందరు మరికొన్ని కారణాలు ఏదైతే చెప్పారో దాన్ని బట్టి, రోమన్ రాజు, అక్కడి రాజు తమ సైన్యంలో ఉన్న సైనికులకు వివాహం చేసుకోవడం నిషిద్ధ పరిచాడు. కానీ అప్పటి కాలంలో అతని దేశంలో ఉన్నటువంటి ఒక క్రైస్తవ ఫాదర్ ‘సెయింట్ వాలెంటైన్’ అని, అతడు రహస్యంగా కొందరి పెళ్లిళ్లు చేస్తూ ఉండేవాడు. అయితే మరికొందరు ఇక్కడ మరో కారణం కూడా చెప్పారు. ఈ వాలెంటైన్ అనే ఫాదర్ ప్రచారం చేస్తూ ఉండేవాడు, ధర్మ ప్రచారం ఆనాటి ప్రకారంగా క్రైస్తవ ధర్మ ప్రచారం. ఆ రాజుకు ఇష్టం లేక అతడు ఆ వాలెంటైన్ ని జైల్లో వేశాడు. అయితే ఏ కారణంతో జైల్లో పోయినా గానీ, జైల్లో వెళ్ళిన తర్వాత అక్కడ జైలర్ ఉంటాడు కదా, ఆ జైలర్ యొక్క కూతురితో అతనికి ప్రేమ కలిగింది. చివరికి అతని ద్వారా ఆమె, ఆమె కుటుంబానికి సంబంధించిన ఎంతోమంది క్రైస్తవ ధర్మంలోకి వచ్చారు. ఈ విషయం రాజుకు తెలిసింది, క్రీస్తుశకం 269 అని కొందరు, 270 అని మరికొందరు.. అయితే 14 ఫిబ్రవరి 269 లేదా 70 నాడు అతనికి ఉరిశిక్ష వేశారు. ఆ ఉరిశిక్ష వేసే ముందు తాను, అంటే వాలెంటైన్, తన యొక్క ప్రేమను చాటి చెబుతూ ఒక లెటర్ తన యొక్క ప్రేమికురాలికి రాశాడు. ఈ విధంగా చారిత్రకంగా ఎన్నో కారణాలు దీని గురించి చెప్పుకుంటారు.

కానీ ఆ కారణాల యొక్క లోతులోకి మనం ఎంత వెళ్ళినా గానీ, ప్రస్తుతం జరుగుతున్నది ఏమిటి? దాని వల్ల నష్టాలు ఏమిటి? వాటిని గమనించడం ఎక్కువ అవసరం గనుక నేను ఇంక కొన్ని కారణాలు కొందరు చరిత్రకారులు ఏదైతే చెప్పారో వాటన్నిటిని నేను ఇప్పుడు చెప్పదల్చుకోలేదు, టైం అందులో మనకు వృధా అయిపోతుంది. సంక్షిప్తంగా మనకు రెండు కారణాలు ఆ చరిత్రలో కనబడుతున్నాయి. ఒకటి: వారు ఆధ్యాత్మిక ప్రేమతో, కొందరి దేవతల ప్రేమతో ఈ ఫిబ్రవరి నెలలో కొన్ని పూజలు చేసుకునేవారు. కానీ తర్వాత క్రైస్తవ ధర్మ ప్రచారంలో కొన్ని సంఘటనలు జరిగాయి, వాలెంటైన్ అనే ఒక ఫాదర్ అతని పేరు ముందుకు వచ్చింది. అందులో కూడా ఒక ప్రేమ కథ అనేది ఉంది. తర్వాత కాలంలో అంటే ఈనాటికి ఒక 200, 250 సంవత్సరాల క్రితం, 1700 శతాబ్దంలో ఆ వాలెంటైన్ అనే పేరు మీద యూరప్ దేశాల్లో ఒకరికి ఒకరు యువకులు, యువతులు ప్రేమ కార్డులు పంచుకోవడం, గులాబీ పువ్వులు వారికి బహుమానంగా ఇవ్వడం, ఇలాంటి ఒక ఉత్సవంగా జరుపుకోవడం మొదలుపెట్టారు.

ఆ మధ్యలో ఈ వాలెంటైన్ డే అనే పేరుతో అశ్లీలత పెరిగిపోతుంది అని క్యాథలిక్ చర్చ్ కు సంబంధించిన పెద్దలు దీన్ని ఖండించారు. ఇది చేయకూడదు అని వారు ఎన్నో వార్నింగ్ లు కూడా ఇచ్చారు. మరియు అదంతా చేసినప్పటికీ ప్రస్తుతం పరిస్థితి ఎక్కడి వరకు వచ్చిందంటే, ఇది కేవలం యూరప్ లోనే కాదు, కేవలం క్రైస్తవుల్లోనే కాదు, ఇది ప్రపంచవ్యాప్తంగా ఇది సర్వసామాన్యం అవుతూ ఉన్నది. మరి ఇందులో చాలా బాధాకరమైన విషయం ఏంటంటే తమకు తాము ముస్లింలం అని అనుకునే ప్రత్యేకంగా యువకులు, యువతులు మరియు ముస్లిం సమాజానికి సంబంధించిన కొందరు ఇందులో అడుగుపెట్టడం, దీనిని ఒక ప్రేమ రోజుగా భావించి ఇందులో వారు చేసే లాంటి కొన్ని పనులు చేయడం.

వాలెంటైన్ డే వేడుకల్లో ఏం జరుగుతుంది?

అయితే సోదరులారా! ఇందులో జరిగేది ఏమిటి? సామాన్యంగా ఇందులో కార్డులు పంచిపెట్టుకుంటారు. ప్రత్యేకంగా అవి కూడా రెడ్ కలర్ లో లేదా కనీసం అందులో ఎర్రపు అక్షరాలతో రాసి ఉన్న ప్రేమ చిహ్న విషయాలు ఉంటాయి మరియు గులాబీ పువ్వు.. ఈ విధంగా కొన్ని కార్యాలు వారు చేసుకుంటారు. ఈ రోజుల్లో అంతకంటే మరీ ఘోరంగా ప్రేమికుల రోజు అని, వాలెంటైన్ డే అని యువకులు, యువతులు బయటికి వెళ్తారు, పార్కులలోకి వెళ్తారు. కొందరు క్లబ్బులు రిజర్వేషన్ చేసుకుంటారు, మరికొందరు మరికొన్ని ఫంక్షన్ హాల్స్ బుక్ చేసుకుంటారు. ఇక అక్కడ జరిగే అశ్లీలత, చెడు అన్నది అన్ని హద్దులకు మీరి ఉంటుంది. చాలా మితిమీరిన కార్యాలు కూడా అక్కడ జరుగుతూ ఉంటాయి.

షైతాన్ యొక్క కుట్ర మరియు మానవ పతనం

రండి ఇస్లాం ధర్మ ప్రకారంగా చూసుకున్నా, లేదా ఒక మానవత దృష్ట్యా మనం దీనిపై గమనించినా, ఒక బుద్ధి గల వ్యక్తి ఎంత మాత్రం ఇలాంటి అశ్లీల కార్యంలో, అశ్లీలతతో కూడి ఉన్న కార్యంలో పాల్గొనడం సహించడు, ఇష్టపడడు. ఇందులో పాల్గొనడం వల్ల మనకు ఏయే నష్టాలు జరుగుతాయి అనేది నేను మీకు చెప్పే ముందు, వివరించే ముందు, షైతాన్ అనేవాడు ఎవడు, మనతోని ఎలాంటి కార్యాలు చేయించాలని అతడు చాలా పాత కాలం నుండి వాగ్దానం చేసి ఉన్నాడు, ఆ యొక్క సత్యాన్ని మీరు ఖురాన్ ద్వారా విని అర్థం చేసుకునే ప్రయత్నం చేయండి. మనందరి మానవుల ఆదిమానవుడైన ఆదం అలైహిస్సలాం, ఆయన్ని స్వయంగా అల్లాహ్ పుట్టించాడు కదా. మరియు స్వయంగా అల్లాహుతాలా ఆయన్ని పుట్టించి స్వర్గంలో ఉంచాడు. మరియు అక్కడ అదే స్వర్గంలో ఆయన యొక్క భార్యను కూడా అల్లాహుతాలా పుట్టించాడు. మరియు అక్కడ వారి ఇద్దరినీ ఉంచి ఒక చిన్న పరీక్ష పెట్టాడు: “మీరు ఈ స్వర్గంలో ఎక్కడ ఏమి తిన్నా, ఎక్కడ ఎలా ఉన్నా పర్వాలేదు, కానీ ఆ చెట్టుకు సమీపానికి వెళ్ళకూడదు.”

కానీ షైతాన్ వాడు ఏం చేశాడు? మోసం చేశాడా? ఎలా మోసం చేశాడు? దాని వివరణలోకి పోతే సమయం సరిపోదు మనకు. సంక్షిప్తంగా షైతాన్ అక్కడ ఎలాంటి పాత్ర వహించాడు అనే విషయాన్ని గమనించండి.

ముందు ఆదం అలైహిస్సలాం, హవ్వా అలైహిస్సలాం వద్దకు షైతాన్ రూపంలో రాలేదు. ఎలా వచ్చాడు? ఏదో చాలా మంచి మనిషి, వారి మేలు గురించి ఏదో ఒక మంచి విషయం చెప్తున్నాడు అన్నట్లుగా వచ్చాడు. అంటే రూపు మార్చి వచ్చాడు.

రెండవ విషయం (అందులో షైతాన్ పాత్ర): ప్రమాణాలు చేశాడు. మూడవది: భ్రమ పెట్టాడు. “ఎందులోనైతే, దేని వల్లనైతే నీకు నష్టం చేకూరుతుంది అని అల్లాహ్ తెలిపాడో, ఆ విషయాన్ని మరిచిపోయే విధంగా నీవు ఈ చెట్టు దగ్గరికి వెళ్లి దాని రుచి చూసి, దాన్ని నీవు తినేదుంటే నీవు దైవదూతవైపోతావు, నీకు శాశ్వతమైన జీవితం ఇక్కడ లభిస్తుంది” అని మోసపు మాటలు.

అర్థమవుతుందా? ఈ విషయాన్ని అల్లాహుతాలా సూరె ఆరాఫ్ లో ప్రస్తావించిన తర్వాత ఏమంటున్నాడు అల్లాహుతాలా?

يَا بَنِي آدَمَ لَا يَفْتِنَنَّكُمُ الشَّيْطَانُ كَمَا أَخْرَجَ أَبَوَيْكُم مِّنَ الْجَنَّةِ يَنزِعُ عَنْهُمَا لِبَاسَهُمَا لِيُرِيَهُمَا سَوْآتِهِمَا

ఓ ఆదం సంతతి వారలారా! షైతాను మీ తల్లిదండ్రులను స్వర్గం నుంచి బయటికి తీయించి, వారి మర్మస్థానాలు వారికి కనిపించేలా చేయటానికి వారి దుస్తుల్ని ఎలా తొలగింపజేశాడో అలాగే వాడు మిమ్మల్ని కూడా చెరపకూడదు సుమా!  (7:27)

ఇక్కడ విషయం గమనించండి. ఇక్కడ ఇప్పుడు చెప్పేవాడు, నసీర్ ఒక ముస్లిం వ్యక్తి అని మీరు గ్రహించకండి, మీరు ఆలోచించకండి. లేదా ఈ బోధనలు కేవలం ముస్లింలకు అని కూడా మీరు అనుకోకండి. అల్లాహ్ ఇస్తున్న సందేశం ఖురాన్ లో ఏంటి గమనించండి: “యా బనీ ఆదం” – ఓ ఆదం సంతానమా! ఓ ముస్లింలారా అంటున్నాడా అల్లాహుతాలా? లేదు. ఓ సౌదీ వాళ్ళు అంటున్నాడా? సర్వ మానవాళిని ఉద్దేశించి సర్వ సృష్టికర్త ఏమంటున్నాడు? “యా బనీ ఆదమ లా యఫ్తినన్నకుముష్ షైతాన్”. షైతాన్ మిమ్మల్ని ఏ ఉపద్రవంలో, ఏ ఫిత్నాలో పడవేయకూడదు, “కమా అఖ్రజ అబవైకుమ్ మినల్ జన్న”, ఎలాగైతే మీ తల్లిదండ్రులైన ఆదం, హవ్వాలను స్వర్గం నుండి అతడు బయటికి రప్పించాడో.

ఆ తర్వాత మరి ఆ ఆయత్ యొక్క అందులోనే ఏముంది? షైతాన్ ఆ కుట్ర ఎందుకు పన్నాడు? అలాంటి పాత్ర వహించి, మోసం చేసి, ప్రమాణాలు చేసి, రూపు మార్చి వచ్చి ఇలాంటి మాటలు ఎందుకు మాట్లాడాడు? “లి యన్జిఅ అన్హుమా లిబాసహుమా లియురియహుమా సౌఆతిహిమా”. వారి యొక్క స్వర్గపు దుస్తులు వారిపై ఏవైతే ఉండెనో వాటిని తీసేసి, వారిని నగ్నంగా చేసేసి, వారు పరస్పరం ఒకరి ఒకరు దాచుకునే అటువంటి మర్మ అవయవాలు మరొకరి ముందు బహిర్గపరచటం, తెరవడం ఆ చెడు ఉద్దేశం వానిది.

అంటే ఏం తెలిసింది? మనిషిని అతని యొక్క మర్మ అవయవాలను భద్రంగా ఉండకుండా, ఒకరి దృష్టి పడకుండా ఏదైతే మనం కాపాడుకోవాలో అలా కాకుండా విచ్చలవిడిగా, అశ్లీలత, నగ్నత్వం ఇలాంటివి బయటపడాలి. మనిషి అన్ని రకాల లజ్జ, బిడియం, అన్ని రకాల హయాకు దూరమైపోవాలి. శీలాన్ని, మానాన్ని కోల్పోవాలి మానవుడు. ఇది ఎవరి పన్నాగం? షైతాన్. అలాంటి షైతాన్ నుండి అల్లాహ్ మనల్ని హెచ్చరిస్తున్నాడు.

ఇక ఈ ప్రేమికుల రోజు, 14 ఫిబ్రవరిలో జరిగే వాలెంటైన్ డే, అందులో ఏం జరుగుతుంది? ఇదే జరుగుతుంది. ఇందులో జరిగే ఏ ఏ కార్యాలు వాళ్ళు చేస్తున్నారో వాటిని మనం కొంచెం పరిశీలిస్తే, ధర్మపరంగా చూసినా, ప్రాపంచిక పరంగా చూసినా అందులో చెడుయే చెడు ఉంది. కానీ యవ్వనంలో బుద్ధి, జ్ఞానాలు అంతా ఎదిగి ఉండవు గనుక, దూరపు ఆలోచన తక్కువ ఉంటుంది గనుక, ముందే దైవ భయభీతి నుండి మనసు ఖాళీ అయిపోతుంది గనుక, షైతాన్ వారికి కొన్ని రకాల మోసపు మాటలతో భ్రమ పెట్టి, అందులో ఎన్నో రకాల మంచితనాన్ని వారికి చూపిస్తాడు. ఉదాహరణకు ఈ రోజుల్లో ఏమనుకుంటారు? ఇది ఈనాటి కాలం యొక్క ఫ్యాషన్. నేను హయ్యర్ చదువు చదువుతున్నాను, నేను అందరితో పాల్గొనడం చాలా ముఖ్యం. మరికొందరు ఏమంటారో తెలుసా? ఈనాటి కాలంలో అమ్మాయిల మీద భరోసా ఏమీ లేకుండా అయిపోయింది, అందుగురించి ఎవరితో మనం పెళ్లి చేసుకోబోతున్నామో వారిని ముందే చూసుకుంటూ ఉండడం, ముందు నుండే కలిసి ఉండడం, వారు వేరే దిక్కు వెళ్ళకుండా, వేరే ఎవరి ప్రేమలో పడకుండా ఉండడం… అంటే వేరే ఎవరి ప్రేమలో పడకుండా ఉండడానికి మనం మన ప్రేమ వలలో చిక్కించాలా? కానీ ఇట్లాంటి మోసపు ఆలోచనలు షైతాన్ వారి మదిలో వేస్తూ ఉంటాడు. దీనివల్ల వారిలో ఎన్నో రకాల చెడు. మొట్టమొదటి సారిగా దైవ భయభీతి, ధర్మపాలన అనేది వారిలో నశించిపోతుంది. ఇంకా వారిలో హయా, సిగ్గు, లజ్జ అనేది నశించిపోతూ ఉంటుంది.

ఇంకా బంధుత్వాలు పెంచుతున్నామన్న ఒక భ్రమలో ఉంటారు కానీ, అతి ముఖ్యమైన బంధుత్వాలను తెంచుతూ ఉంటారు. సామాన్యంగా యువకులు ఈ రోజుల్లో ఏ ప్రేమలో పడతారో.. సామాన్యంగా అమ్మాయిలు ఇంట్లో ఎక్కువ చెప్పుకోకపోయినా, యువకులు తండ్రితో కాకున్నా తల్లితో, తల్లితో కాకున్నా ఇంట్లో ఏదైనా పెద్ద అక్క ఉండేదుంటే వారితో సైలెంట్ గా, ఎంతో గోప్యంగా, రహస్యంగా “నేను ఫలానా అమ్మాయిని ప్రేమిస్తున్నాను, ఆమెలో ఇన్ని రకాల మంచితనాలు ఉన్నాయి, ఆమె యొక్క గుణం ఇలా ఉంది, ఆమె రేపటి రోజు వచ్చి తల్లికి సాయం చేస్తుంది, మన ఇంట్లో ఇలా ఉంటుంది, అలా ఉంటుంది, ఈ విధంగా నేను ఆ అమ్మాయిని పెళ్లి చేసుకుంటే మన ఫలానా సంబంధం పెరుగుతుంది, మనకు ఫలానా ఫలానా లాభాలు కలుగుతున్నాయి” అన్నటువంటి కొన్ని ఇలాంటి మాటలు అల్లుతూ ఉంటారు, చెబుతూ ఉంటారు. కానీ వాస్తవానికి ఈ విధంగా తల్లిదండ్రి యొక్క ప్రేమకు స్వయంగా వారి మనసులో అక్రమమైన ఒక ప్రేమ అమ్మాయిది కుదిరింది, లేదా ఒక అమ్మాయి మనసులో అక్రమ మార్గాల ద్వారా ఒక అబ్బాయి ప్రేమ కుదిరింది అంటే ఏమవుతుంది? తల్లిదండ్రుల ప్రేమ అనేది తగ్గుతూ పోతుంది.

గమనించండి, ఎవరైతే వయసు ఎదిగి ఉన్నారో వారికి ఈ విషయాలు చాలా తొందరగా అర్థం కావచ్చు. కానీ ఎవరైతే ఇంకా వేడి రక్తంలో ఉండి, ఇంకా యవ్వనంలో ఉన్నారో కొంచెం మనం ఆలోచిస్తే, కొన్ని సందర్భాల్లో మనం మన ప్రేమికుడు లేదా ప్రేమికురాలు, ఆమె వారి యొక్క కోరికలను పూర్తి చేయడానికి ఎన్నో త్యాగాలకు మనం సిద్ధపడతాము. కానీ అదే ఏదైనా చిన్న ఆదేశం తల్లిదండ్రి వైపు నుండి వచ్చింది అంటే ఆ త్యాగానికి మనం సిద్ధపడము. అయితే ఇక్కడ విషయం ఇంకా దీని గురించి లోతుగా మనం మన సమాజంలో ఉన్న ఎన్నో ఉదాహరణలు తీసుకుంటే మాట ఎక్కువైపోతుంది.

మరొక చాలా పాపం, ఎన్నో ఎందరో యువకులు, యువతులు ఇలాంటి 14 ఫిబ్రవరి వేడుకల్లో, సంబరాల్లో పాల్గొంటారో సామాన్యంగా ఎక్కువ మందితో జినా, వ్యభిచారం అనేది జరిగిపోయి ఉంటుంది. అల్లాహ్ కాపాడుగాక! మరి ఈ వ్యభిచారం ఎంత మహా చెడ్డ కార్యం, ఎంత మహా చెడ్డ పాపం. అందుగురించే ఖురాన్ లో అల్లాహుతాలా ఆ జినా, వ్యభిచారం దాని యొక్క దరిదాపులకు కూడా మీరు వెళ్ళకండి అని అల్లాహుతాలా మనకు ఖురాన్ లో ఆదేశించాడు. డైరెక్ట్ వ్యభిచారం చేయకండి అని అక్కడ డైరెక్ట్ గా చెప్పలేదు. ఏమన్నారు? “వలా తఖ్రబుజ్ జినా” – మిమ్మల్ని వ్యభిచారం వరకు తీసుకెళ్ళే ఏ ఏ సాధనాలు అయితే ఉన్నాయో వాటన్నిటికీ మీరు దూరంగా ఉండండి.

ఇంకా ఇలాంటి కార్యాలు జరిగిన తర్వాత సమాజంలో తల్లి ముఖం ఎత్తకుండా, తండ్రి తమ స్నేహితుల్లో, తమ బంధువుల్లో ముఖం చూపించకుండా అయిపోతాడు. చివరికి అతడు కూడా, అతని వేడి రక్తంలో అతనికి తొందరగా అర్థం కాదు, “నేను మహా ఘన కార్యం చేశాను” అన్నట్లుగా భావిస్తాడు. “పోనీ నా బంధువులు అందరూ దూరమైపోయినా ఏమవుతుంది, నేను సంపాదించేవాణ్ని, నేను ఒక పురుషుణ్ని” అన్నటువంటి చెడు భ్రమలో పడి “తీసుకెళ్లి ఎక్కడైనా నేను బ్రతకవచ్చు” అని అనుకుంటాడు. కానీ స్వయంగా కొద్ది రోజులు గడిచిన తర్వాత అతని మనసు, లేదా ఉర్దూలో దాన్ని అంటారు ‘జమీర్’ అని, అంతరాత్మ అతన్ని నిందిస్తూ ఉంటుంది. “ఛీ, నువ్వు ఎలాంటి మనిషివి. ఒక స్త్రీ ప్రేమలో పడి నీ తల్లిని దూరం చేసుకున్నావు, నీ తండ్రిని దూరం చేసుకున్నావు, అక్కచెల్లెళ్లను దూరం చేసుకున్నావు, అన్నదమ్ములను దూరం చేసుకున్నావు” అన్నటువంటి బద్నామీ, అన్నటువంటి చెడు పేరు అతనికి పుడుతూ ఉంటుంది.

అంతేకాకుండా ఈ 14 ఫిబ్రవరిలో ఎన్నో రకాల మోసాలు జరుగుతూ ఉంటాయి. జరుగుతాయి. ఇందులో కేవలం మోసాలే కాదు, ఆత్మహత్యలు, గొడవలు, హత్య నేరాలు అటువంటివి కూడా జరుగుతూ ఉంటాయి. ఈ సంవత్సరం ఒక ఫంక్షన్ లో పాల్గొన్నాడు, ఒక అమ్మాయి నచ్చింది. ఆ తర్వాత ఏదో ఫంక్షన్ లో వెళ్ళిన తర్వాత అంతకంటే మరి అమ్మాయి నచ్చింది. అతనితో ఏదైనా సంబంధం కుదిరించబోయిండు, అతని యొక్క ప్రేమికుడు ఇతనికి శత్రువుగా మారిండు. ఈ విధంగా ఎన్నో సంఘటనలు ఇంకా మన సమాజంలో జరుగుతూనే ఉన్నాయి. వీటన్నిటికంటే భయంకరమైనది షిర్క్. ఒక ముస్లిం అనే వ్యక్తి షిర్క్ అనే ఘోరమైన పాపం ఏదైతే ఉందో దాని నుండి కూడా భయపడాలి.

నిజమైన ప్రేమ (Love) ఇస్లాం దృష్టిలో

ప్రేమ అన్న ఈ పదం, దీని వాస్తవికత ఏంటంటే ప్రతి ప్రాణిలో, ప్రత్యేకంగా మనిషిలో అల్లాహుతాలా ఈ ప్రేమను పుట్టించాడు, ఉంచాడు. కానీ స్వయంగా అల్లాహుతాలా వీటి యొక్క హద్దులు తెలిపాడు, నేర్పాడు. మనం ముందు అల్లాహ్ యొక్క దాసులం. మన సృష్టికర్త అయిన అల్లాహ్ మనల్ని పుట్టించాడు. అందుగురించి అందరికంటే ఎక్కువ ప్రేమ మనకు ఎవరిది ఉండాలి? ఎవరిది? అల్లాహ్ యొక్క ప్రేమ ఉండాలి. కేవలం చెప్పుకునే వరకే కాదు, వాస్తవ రూపంలో, ఆచరణ రూపంలో ఉండాలి. అల్లాహ్ ఇలాంటి సద్భాగ్యం మనకు ప్రసాదించుగాక.

ఈ ప్రేమ, అల్లాహ్ యొక్క ప్రేమ ఇది ధార్మిక ప్రేమ. అల్లాహ్ తో పాటు, అల్లాహ్ తర్వాత ప్రవక్త మహనీయ ముహమ్మద్ సల్లల్లాహు అలైహి వసల్లం వారి యొక్క ప్రేమ ఉండాలి. కానీ ఈ రోజుల్లో ఏం జరుగుతుంది? ఈ రెండు ప్రేమలు, అల్లాహ్ మరియు ప్రవక్త ముహమ్మద్ సల్లల్లాహు అలైహి వసల్లం వారిద్దరి ప్రేమలు ఏ విధంగా ఉండాలో అలా లేనందువల్ల మనం ఎన్నో రకాల చెడులకు గురవుతున్నాము. ప్రేమ అన్నది ధార్మిక పదం కూడా. ఖురాన్ లో అల్లాహుతాలా చెప్పాడు:

يَا أَيُّهَا الَّذِينَ آمَنُوا مَن يَرْتَدَّ مِنكُمْ عَن دِينِهِ فَسَوْفَ يَأْتِي اللَّهُ بِقَوْمٍ يُحِبُّهُمْ وَيُحِبُّونَهُ
ఓ విశ్వాసులారా! మీలో ఎవరయినాసరే తమ ధర్మం నుంచి తిరిగిపోతే (పోవచ్చు), అల్లాహ్‌ త్వరలోనే మరో జాతి వారిని తీసుకువస్తాడు. అల్లాహ్‌ వారిని ప్రేమిస్తాడు, వారు అల్లాహ్‌ను ప్రేమిస్తారు. (5:54)

సుబ్ హాన వ త’ఆలా, గమనించండి. అల్లాహుతాలా మరికొన్ని కార్యాలు, వేరే విషయాలు చెప్పాడు కానీ అన్నిటికంటే ముందు ఈ ప్రేమ విషయాన్ని ప్రస్తావించాడు. అదే సూరె బఖరాలో:

وَالَّذِينَ آمَنُوا أَشَدُّ حُبًّا لِّلَّهِ
[వల్లజీన ఆమనూ అషద్దు హుబ్బన్ లిల్లాహ్]
…కాని విశ్వాసులు అందరికంటే అత్యధికంగా అల్లాహ్ నే ప్రేమిస్తారు… (2:165) అని అల్లాహుతాలా చెప్పాడు.

ఇక ఆ తర్వాత ప్రజల్లో, మానవుల్లో ఎవరెవరితో ఎలాంటి ప్రేమ ఉండాలి అనేది అల్లాహ్ ఆదేశించిన మేరకు ఉండాలి.

ఇకపోతే మరొక ప్రేమ ప్రకృతిపరమైనది. ప్రకృతిపరమైన ప్రేమ దానిని కూడా అల్లాహుతాలా అనుమతిచ్చాడు. కానీ అది ధర్మపరమైన ప్రేమ కంటే మించి ఇతరుల పట్ల ఉండకూడదు. సామాన్యంగా ఈ రోజుల్లో అల్లాహ్ ను కాకుండా వేరే వారిని ఎవరైతే పూజిస్తారో – విగ్రహాలను కానీ, ఇంకా వేరే ఏవైనా కానీ – వారు వారిని ప్రేమిస్తారు. కదా? సామాన్యంగా మనం ఏమంటాము? ఇలాంటి ఆ ప్రేమ షిర్క్ ప్రేమ. ఆ ప్రేమ కేవలం అల్లాహ్ తోనే ఉండేదుంటే ఇది తౌహీద్ అవుతుంది. కానీ అల్లాహ్ ను ప్రేమించే విధంగా వేరే ఎవరినైనా దేవతలను, దేవీలను ప్రేమిస్తే ఏమవుతుంది? షిర్క్ అవుతుంది అని అంటాము.

కానీ ఈ 14 ఫిబ్రవరిలో కూడా ప్రేమ పేరు మీద ఏదైతే జరుగుతుందో, యువకుల యువతుల మధ్య ఏ ప్రేమలైతే ఉంటాయో ఇవి కూడా షిర్క్ వరకు చేరుతాయి. కానీ వాటిని మనం గమనించడం లేదు. అందుగురించి సోదరులారా, మహాశయులారా! ఈ ప్రేమ వలలో చిక్కుకోకుండా ఇలాంటివన్నీ, కొన్ని పది వరకు ఏదైతే నేను పాపాలు లెక్కించానో, వాటిని, వాటిలో మనం పడకుండా ఉండడానికి ప్రయత్నం చేయాలి. ఎలా చేయగలుగుతాము? అసలు ఇందులో పడడానికి మూల కారణాలు ఏమిటి? ముందు ఇలాంటి 14 ఫిబ్రవరికి సంబంధించిన గానీ లేక వేరే తప్పుడు ప్రేమలు ఏవైతే ఉన్నాయో వాటిలో పడడానికి కారణాలు ఏంటి అవి తెలుసుకుందాము, అలాంటి కారణాల్లో ఎవరైనా ఉండేదుంటే దూరం కావడానికి. ఆ తర్వాత వీటి నుండి బయటికి వచ్చే మార్గాలు ఏమిటో అవి కూడా తెలుసుకుందాము.

యువత పెడదారిన పడడానికి కారణాలు మరియు పరిష్కారాలు

దీన్నే సామాన్యంగా ఏమంటాం మనం? ఫస్ట్ రోగాన్ని ఏర్పాటు చేయడం, ఈ రోగం ఎలా వచ్చింది అనేది రీజన్. తర్వాత దానికి ట్రీట్మెంట్. సోదరులారా ఈ రోజుల్లో ఒక యువకుడు ఒక యువతి ప్రేమలో చిక్కిపోతున్నాడు, పడిపోతున్నాడు లేక ఒక యువతి యువకుని ప్రేమలో పడుతుంది అనడానికి మూల కారణం: ఇక్తిలాత్. అంటే పరదా, హిజాబ్ ఇలాంటి ఏవీ లేకుండా కలిసిమెలిసి ఉండడం. కో-ఎడ్యుకేషన్ గానీ… ఇందులో అతి ముఖ్యమైనది మన ఇండ్లల్లో మనం పెద్దలం మన యొక్క బిడ్డలకు, భార్యలకు, అక్కచెల్లెళ్లకు పరదా యొక్క శిక్షణ ఇవ్వకపోవడం. మరియు చదువు విషయంలో గానీ, బజార్లలో గానీ, ఇంకా పెళ్లిళ్లలో గానీ, వేరే ఎన్నో చోట్ల స్త్రీలు, పురుషులు కలిసిమెలిసి ఉండడం. ప్రవక్త మహనీయ ముహమ్మద్ సల్లల్లాహు అలైహి వసల్లం ఒక సందర్భంలో చెప్పారు: “ఏ పురుషుడు కూడా స్త్రీతో ఒంటరిగా ఉండకూడదు.” ఎందుకు? దీని వల్ల ఏం జరుగుతుంది? మహనీయ సల్లల్లాహు అలైహి వసల్లం చెప్పారు: “ఎక్కడైతే ఒక వ్యక్తి ఒక స్త్రీతో ఒంటరిగా కలుస్తాడో అక్కడ వారిద్దరి మధ్యలో షైతాన్ మూడో వాడై కలుస్తాడు.” ఇక ఎక్కడైతే షైతాన్ వచ్చి కలుస్తాడో అక్కడ మేలు జరుగుతుందా? ఇంతకుముందే ఆదం అలైహిస్సలాం సంఘటన మనం విన్నాము.

అయితే ఇక ఏం చేయాలి మరి? ఇలాంటి కో ఎడ్యుకేషన్ (Co-education/mixing), అందరూ కలిసిమెలిసి ఉండే సందర్భాలు ఏవైతే ఉన్నాయో వాటికి దూరంగా ఉండాలి. మరొక హదీస్ కూడా మీకు వినిపిస్తాను. ఈ రోజుల్లో ఏం జరుగుతుంది? అశ్లీలతను, చెడును, వ్యభిచారాన్ని మనం తెలియకుండానే ఎలా ప్రచారం చేస్తూ ఉంటామో గమనించండి. బహుశా మీరు కూడా చూసి ఉండవచ్చు. పెన్ ప్రతి ఒక్కరు ఉపయోగిస్తారా లేదా? సామాన్యంగా స్కూళ్లలో పెన్ లలో ఏం రాసి ఉండేది? ‘టచ్ మీ’ (Touch me), ‘కిస్ మీ’ (Kiss me) ఇంకా ఇట్లాంటి పదాలు ఉంటాయి కదా. అంతేకాకుండా ఈ కార్డుల మీద, కీచైన్ అని ఉపయోగిస్తాము, అలాంటి వాటి మీద. కానీ వీటి ద్వారా ఎంత చెడు ప్రబలిపోతుంది, అశ్లీలత పెరిగిపోతుంది అనే విషయాన్ని ప్రజలు గమనించడం లేదు.

ఒక సందర్భంలో ప్రవక్త మహనీయ ముహమ్మద్ సల్లల్లాహు అలైహి వసల్లం చెప్పారు:

لَأَنْ يُطْعَنَ فِي رَأْسِ أَحَدِكُمْ بِمِخْيَطٍ مِنْ حَدِيدٍ خَيْرٌ لَهُ مِنْ أَنْ يَمَسَّ امْرَأَةً لَا تَحِلُّ لَهُ
[ల అన్ యుతఅన ఫీ రసి అహదికుమ్ బిమిహ్యతిన్ మిన్ హదీదిన్ ఖైరుల్ లహు మిన్ అన్ యమస్స ఇమ్రఅతన్ లా తహిల్ల లహు]
మీలో ఒక వ్యక్తి నెత్తి మీద ఇనుప సూది తో పొడవటం, అతనికి ధర్మసమ్మతం కాని ఒక స్త్రీని తాకడం కంటే చాలా మేలు. (తబ్రానీ యొక్క సహీహ్ హదీస్)

సామాన్యంగా షైతాన్ ఎలాంటి వస్వసాలు వేస్తాడు? అబ్బా! ఎంత స్మార్ట్ గా ఉందిరా, కొంచెం ఒక్కసారి అట్లా పక్కనుండి పోతే… ఇట్లాంటి చెడు ప్రేరేపణలు షైతాన్ గాడు వేస్తాడు కదా? అలాంటప్పుడు ఇలాంటి హదీస్ లను మనం గమనించాలి. ప్రవక్త ఏమంటున్నారు? మీరు ఒక ఇనుప సూది తోని మిమ్మల్ని కొట్టడం, అలా దానితో ఒక దెబ్బ మీకు తగలడం, మీకు ధర్మసమ్మతం కాని ఒక స్త్రీతో మీరు టచ్ కావడం కంటే చాలా మేలు. అంటే ధర్మసమ్మతం కాని స్త్రీతో టచ్ కావడం అంతకంటే మరీ ఘోరమైన విషయం అని.

ఇంకా సామాన్యంగా స్త్రీలు బయటికి వెళ్ళేటప్పుడు అలంకరణతో వెళ్లడం, ఇది కూడా మహా చెడుకు మూల కారణం. కానీ ఈ రోజుల్లో సమాజంలో వారు ఏమనుకుంటారు? స్త్రీలే కాదు, చివరికి వారి యొక్క భర్తలు గానీ, వారి యొక్క తండ్రులు గానీ, వారి యొక్క సోదరులు గానీ.. ఇది స్త్రీ యొక్క హక్కు, ఆమె ఇష్టం ఎట్లా వెళ్లినా ఏంటి? కానీ ఎంత బుద్ధి తక్కువ తనం. ఏ మంచి వస్తువు అయినా గానీ అది కప్పబడి, దాన్ని ఏదైనా మరో వస్తువుతోని మూసివేసి, బయటికి తీసుకెళ్తే ఎవరి దృష్టి పడకుండా ఉంటుంది. కానీ ఓపెన్ గా ఉంటే? మీరు కొని తినే వస్తువులే చూసుకోండి. చివరికి ఒక చిన్న ఉదాహరణ చాక్లెట్ యే చూడండి. చాక్లెట్ కవర్ లో ఉంటే మీకు మంచిగా అనిపిస్తుందా? కవర్ లో లేకుండా బయట ఉంటే మంచిగా అనిపిస్తుందా? స్త్రీ అదే కవర్ లో, బుర్ఖాలో.. దాన్ని చెడు అని అంటున్నారు. అంటే ఈ రోజుల్లో ఈ చెడు ఎంత ప్రబలిపోయిందంటే మన యొక్క ఆలోచనలే మారిపోతున్నాయి.

సోదరులారా ఈ విధంగా చూసుకుంటూ పోతే ఎన్నో కారణాలు కావచ్చు. కానీ వీటికి అడ్డుకట్ట ఎలా కట్టాలి అని అంటే, ముందు దైవ భయభీతి అనేది మనలో రావాలి. మరియు ఇంట్లో పెద్దలు దూరపు ఆలోచనతో తమ యొక్క సంతానం పట్ల వారి యొక్క బాధ్యత ఎంతవరకు ఉన్నదో అనే విషయాన్ని గమనించాలి. ఈ రోజుల్లో చాలావరకు తల్లులు, తండ్రులు తమ సంతానం యొక్క బాధ్యత గురించి చాలా అలక్ష్యత, ఎలాంటి బాధ్యత లేదు అన్నటువంటి భావంలో పడి ఉన్నారు. ప్రవక్త మహనీయ ముహమ్మద్ సల్లల్లాహు అలైహి వసల్లం వారు చెప్పారు: “కుల్లుకుమ్ రాయిన్ వ కుల్లుకుమ్ మస్వూలున్ అన్ రఇయ్యతిహి”. మీలో ప్రతి ఒక్కడూ సంరక్షకుడే మరియు మీలో ప్రతి ఒక్కరూ తన బాధ్యతలో ఉన్న వారి గురించి ప్రళయ దినాన ప్రశ్నించబడతాడు. అంతేకాకుండా ప్రతి యువకుడు తన దృష్టిని కాపాడుకునే ప్రయత్నం చేయాలి. ఎందుకంటే దృష్టి ఇది ఫస్ట్ స్టెప్. ఈ దృష్టి ఎక్కడ పడుతుందో అక్కడి నుండి చెడు ఆలోచనలు మొదలవుతాయి, ఆ తర్వాత చెడు ప్రయత్నాలు మొదలవుతాయి. ఈ దృష్టిని మనం కాపాడుకోలేకపోతే ఈ చేతిని కూడా వ్యభిచారంలో పడకుండా మనం కాపాడలేము, కాళ్లను కూడా వ్యభిచారంలో పడకుండా మనం కాపాడలేము. అందుగురించే ప్రవక్త మహనీయ ముహమ్మద్ సల్లల్లాహు అలైహి వసల్లం వారు చెప్పారు: “అనుకోకుండా, అకస్మాత్తుగా ఎవరైనా స్త్రీ మీద మీ దృష్టి పడితే, మరోసారి కావాలని మీరు చూడకండి” అని మనకు ప్రవక్త గారు ఆదేశించి ఉన్నారు.

అంతేకాకుండా యువకులు సంపాదించేవారు కొంతవరకు వారిలో బాధ్యత భావం కలిగింది అంటే పెళ్లిళ్లు చేయడంలో తొందరపాటు చేయాలి. ఎందుకు? పెళ్లిళ్లు కానందువల్ల, పెళ్లికి సంబంధించిన ఈ కట్నకానుకల యొక్క సాకులతో పెళ్లిళ్లు ఆలస్యమైపోతున్నాయి. మరి ఎందరో యువతులు, యువకులు? ఈ మన సమాజంలో కట్నకానుకల ప్రాబ్లం ఏదైతే ఉందో అది పోవాలంటే ప్రేమించి పెళ్లి చేసుకోవాలి. అదే చాలా ఈజీగా ఉంటుంది. అంటే ఇలాంటి తప్పుడు మార్గంలో పడడానికి ఒక కారణం మన ఈ కట్నకానుకలు కూడా ఉన్నాయి, వాటిని ఖండించే తక్కువ చేసే ప్రయత్నం చేయాలి. ప్రతి ఒక వ్యక్తి, ప్రతి మనిషి ఇలాంటి అశ్లీల కార్యాల్లో పాల్గొనకూడదు. కొన్ని సందర్భాల్లో ఏం జరుగుతుంది? మా కాలేజీ వాళ్ళు 14 ఫిబ్రవరి సెలబ్రేషన్ చేస్తున్నారు అందులో పాల్గొనాలి. ఏదో ఒక రకంగా మీరు మీ అబ్బాయిలకు, మీ అమ్మాయిలకు, మీ సంతానానికి ఏదో మంచి గిఫ్ట్స్ లేదా వేరే ఎక్కడైనా ప్రయాణం ఉద్దేశంతో తీసుకెళ్లి ఇలాంటి సెలబ్రేషన్స్ లలో పాల్గొనకుండా ఉంచండి.

ఎందుకు? ఖురాన్ లో అల్లాహ్ తాలా చెప్పాడు:

إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ فِي الدُّنْيَا وَالْآخِرَةِ
[ఇన్నల్లజీన యుహిబ్బూన అన్ తషీఅల్ ఫాహిషతు ఫిల్ల్దజీన ఆమనూ లహుమ్ అజాబున్ అలీమున్ ఫిద్దున్యా వల్ ఆఖిరతి]
“ఎవరైతే విశ్వాసుల మధ్య చెడు, అశ్లీలత, అసహ్య కార్యాలు ప్రబలిపోవాలి అని కోరుతారో అలాంటి వారికి ఈ లోకంలో చాలా కఠినమైన, బాధాకరమైన శిక్ష ఉంది మరియు ప్రళయ దినాన కూడా చాలా కఠినమైన శిక్ష వారికి ఉంది.“

ఆ తర్వాత అల్లాహ్ ఏమంటున్నాడు గమనించండి: “వల్లాహు యలము వ అన్తుమ్ లా తలమూన్” – అల్లాహ్ కు చాలా తెలుసు, మీకు తెలియదు. అంటే ఈ చెడును ఎంత మాత్రం ప్రబలకుండా, చెడు యొక్క ప్రచారం జరగకుండా మీరు ప్రయత్నం చేయండి. కానీ ఎవరైతే చెడు ప్రచారం కావాలని కోరుకుంటారో అలా కోరుకునే వారి గురించి కూడా కఠినమైన శిక్ష ఇహపరలోకాల్లో ఉన్నది అని అల్లాహ్ తాలా హెచ్చరిస్తున్నాడు.

మరి ఎవరైతే ఇలాంటి వారి కార్యాల్లో పాల్గొంటారో, ప్రవక్త మహనీయ ముహమ్మద్ సల్లల్లాహు అలైహి వసల్లం వారి యొక్క ఈ హదీసు నుండి కూడా భయపడాలి. ప్రవక్త సల్లల్లాహు అలైహి వసల్లం వారు చెప్పారు: “మన్ తషబ్బహ బి ఖౌమిన్ ఫహువ మిన్హుమ్”. ఎవరైతే మరొకరి పోలికలు వహిస్తారో వారి గతి వారితోనే అవుతుంది. ఇమామ్ ఇబ్నె కసీర్ రహ్మతుల్లాహి అలైహి చెప్పారు ఈ హదీస్ లో ఎవరైతే అవిశ్వాసులు చెడు కార్యాలు చేస్తున్నారో, చెడు మాటలు మాట్లాడుతున్నారో, వారి యొక్క చెడు వస్త్రాలు ఏవైతే ఉన్నాయో.. అలాగే వారి యొక్క పండుగలు, వారి యొక్క ప్రార్థనలు, ఆరాధనలు వీటన్నిటిలో పాల్గొనడం వారి యొక్క కార్యాలు చేయడం లాంటిది. మరి అలాంటి వారి గతి వారితోనే అవుతుంది.

అంతేకాకుండా ఖురాన్ లో కూడా అల్లాహ్ తాలా ఏం చెప్పాడు?

وَمَن يَتَوَلَّهُم مِّنكُمْ فَإِنَّهُ مِنْهُمْ
[వ మన్ యతవల్లహుమ్ మిన్కుమ్ ఫ ఇన్నహు మిన్హుమ్]
మీలో ఎవరైతే (అవిశ్వాసులను) స్నేహితులుగా చేసుకుంటారో, వాడు వారిలోని వాడే. (5:51)

ఎవరైతే ఇలాంటి చెడు కార్యాలు చేసే వారితో స్నేహాన్ని కుదుర్చుకొని, అలాంటి చెడుకు ప్రోత్సహించి వారితో ఉంటాడో వారి గతి చివరికి వారితోనే అయిపోతుంది.

ఈ విధంగా సోదరులారా చాలా హెచ్చరికలు ఉన్నాయి. అందుగురించి మనం ఇలాంటి విషయాలకు భయపడాలి. 14 ఫిబ్రవరి వాస్తవానికి ప్రేమికుల రోజు కాదు, చెడును ప్రచారం చేసే, అశ్లీలత, వ్యభిచారం ఇంకా ఎన్నో రకాల పాపాలు ప్రబలించే ఈ చెడ్డ దినం. ఆ దినాన్ని సెలబ్రేట్ చేసుకోవడం, దాన్ని ఒక ఉత్సవంగా భావించడం ఇది మహా తప్పు కార్యం.

అల్లాహ్ మనందరినీ కూడా ఇలాంటి చెడుల నుండి కాపాడుగాక. అల్లాహ్ తాలా మనందరినీ కూడా మంచి మార్గంలో ఉంచి, బుద్ధి జ్ఞానాలతో ఇలాంటి చెడులకు దూరముండి ఇతరులను కూడా దూరం ఉంచే భాగ్యం మనందరికీ ప్రసాదించుగాక. జజాకుముల్లాహు ఖైర్. అస్సలాము అలైకుమ్ వరహ్మతుల్లాహి వబరకాతుహు.

ఈ పోస్ట్ లింక్ :
https://teluguislam.net/?p=8625

---