ఈ ప్రసంగంలో, ఇస్లాంలో వ్యభిచారం (జినా) యొక్క నిషేధం గురించి, దాని తీవ్రత, అది దారితీసే మార్గాలను ఇస్లాం ఎలా నిరోధిస్తుంది, మరియు ఈ పాపానికి పాల్పడిన వారికి ప్రపంచంలో మరియు మరణానంతరం విధించబడే కఠిన శిక్షల గురించి చర్చించబడింది. హిజాబ్ (పరదా) యొక్క ఆవశ్యకత, చూపులను అదుపులో ఉంచుకోవడం, మరియు ఒంటరిగా పర స్త్రీ-పురుషులు కలవడాన్ని ఇస్లాం ఎందుకు నిషేధించిందో వివరించబడింది. వివాహితులు మరియు అవివాహితులు చేసే వ్యభిచారానికి గల శిక్షలలో తేడా, వృద్ధాప్యంలో ఈ పాపానికి పాల్పడటం యొక్క తీవ్రత, మరియు పేదరికాన్ని కారణంగా చూపి ఈ పాపంలో మునిగిపోవడాన్ని ఇస్లాం అంగీకరించదని స్పష్టం చేయబడింది. ఆధునిక సమాజంలో వ్యభిచారానికి దారితీసే కారణాలను వివరిస్తూ, ఈ చెడు నుండి దూరంగా ఉండేందుకు అల్లాహ్ను ప్రార్థించడం జరిగింది.
ఇక రండి ఈనాటి కాలంలో చాలా ప్రబలుతున్నటువంటి, ప్రత్యేకంగా ఈ స్మార్ట్ ఫోన్లు వచ్చిన తర్వాత, నెట్ టెక్నాలజీ పెరిగిన తర్వాత, ఏ నిషేధాల్లో అనేకమంది ప్రజలు పడుతున్నారో దాని గురించి తెలుసుకుందాము. అది వ్యభిచారం.
ఇస్లాం ధర్మ ఉద్దేశాల్లో మానము మరియు గౌరవముల రక్షణ మరియు సంతానోత్పత్తి రక్షణ చాలా ముఖ్యమైనది. అందుకే ఇస్లాం వ్యభిచారాన్ని నిషేధించింది. అల్లాహ్ త’ఆలా సూరత్ బనీ ఇస్రాయీల్ ఆయత్ నంబర్ 32 లో తెలిపాడు,
وَلَا تَقْرَبُوا الزِّنَا ۖ إِنَّهُ كَانَ فَاحِشَةً وَسَاءَ سَبِيلًا “వ్యభిచారం దరిదాపులకు కూడా పోకూడదు సుమా! ఎందుకంటే అది నీతి బాహ్యమైన చేష్ట. మహా చెడ్డమార్గం” (17:32)
వ్యభిచారం దరిదాపులకు కూడా వెళ్ళకండి. ఇక్కడ గమనించండి ఆయతులో ‘లా తఖ్రబు’ అని చెప్పబడింది. ‘లా తజ్నూ’ వ్యభిచారం చేయకండి అని డైరెక్ట్ గా చెప్పలేదు. ‘లా తఖ్రబు’ అంటే ఆ వ్యభిచారం వరకు చేర్పించే ఏ ఏ మార్గాలు ఉంటాయో అవన్నిటినీ వదులుకోండి, వాటి దగ్గరికి వెళ్ళకండి.
నిశ్చయంగా అది అతి దుష్టకార్యం మరియు చాలా బహు చెడ్డ మార్గం. షేక్ ఉథైమీన్ రహిమహుల్లాహ్ ఈ రెండు పదాల యొక్క మంచి వ్యాఖ్యానం కూడా చేసి ఉన్నారు. ఎందుకు దీనిని చెడ్డ మార్గం అనడం జరిగింది? ఎందుకు దీనిని అశ్లీలం, అతి దుష్టకార్యం అని చెప్పడం జరిగింది? అయితే సోదర మహాశయులారా, ఇన్షాఅల్లాహ్ దానికి సంబంధించి ప్రత్యేకమైన దర్స్ ఇచ్చినప్పుడు ఇంకా వివరాలు విందాము.
సర్వసామాన్యంగా వ్యభిచారానికి పాల్పడే అటువంటి పరిస్థితి ఎప్పుడు వస్తుంది? దానికంటే ముందు కొన్ని జాగ్రత్తలు పాటించనందువల్ల. అందుకే దాని వరకు చేర్పించే మార్గాలను ఇస్లాం నిషేధించింది. దాని వరకు చేర్పించే సాధనాలను కూడా మూసివేసింది.
హిజాబ్ (పరదా) యొక్క ఆవశ్యకత
ఈ మార్గాలను, వ్యభిచారం వరకు చేర్పించే సాధనాలను ఏదైతే మూసివేశాడో, వాటిలో ఒకటి ఏమిటి? అల్లాహ్ త’ఆలా హిజాబ్ యొక్క ఆదేశం ఇచ్చాడు, పరదా యొక్క ఆదేశం ఇచ్చాడు. నేను ప్రత్యేకంగా దీనిని కూడా హెడ్ లైన్ గా, రెడ్ లైన్ గా, రెడ్ కలర్ లో ఇచ్చి దానికి లింక్ పెట్టడానికి ముఖ్య కారణం ఏంటంటే, ఇప్పటికీ మన సమాజంలో ప్రబలి ఉన్నటువంటి గోదీ మీడియా అనండి లేదా స్వార్థపరులైన పత్రికా రిప్రజెంటేటివ్స్, టీవీ ఛానల్స్ వాళ్ళు ఇస్లాం జ్ఞానం మొత్తానికే లేదు వారికి, ఇస్లాంలో ఎక్కడా కూడా పరదా యొక్క ఆదేశం లేదు అని అంటారు, అస్తగ్ఫిరుల్లాహ్.
ఇక్కడ చూడండి, సూరతుల్ అహ్ జాబ్, సూరా నంబర్ 33, ఆయత్ నంబర్ 53. అలాగే సూరతుల్ అహ్ జాబ్ ఆయత్ నంబర్ 59 లో అల్లాహ్ త’ఆలా పరదా యొక్క ఆదేశం ఇచ్చాడు. ఈ ఆదేశం చాలా స్పష్టంగా ఉంది. ఇందులో ఎలాంటి అనుమానం లేదు. అల్లాహ్ త’ఆలా చాలా స్పష్టంగా చెబుతున్నాడు, మీరు స్త్రీలతో ఏదైనా అడగాలనుకుంటే,
فَسْـَٔلُوْهُنَّ مِنْ وَّرَاۤءِ حِجَابٍ (ఫస్ అలూహున్న మివ్ వరా’ఇ హిజాబ్) “పరదా వెనుక ఉండి అడగాలి.” (33:53)
హిజాబ్ వెనుక ఉండి అడగాలి. ముంగటగా అటు ఒక స్త్రీ ఉంది, ఇటు నేను ఉన్నాను, డైరెక్ట్ గా అడగకూడదు. ఏదైనా ఇద్దరి మధ్యలో అడ్డు ఉండాలి, పరదా ఉండాలి, హిజాబ్ ఉండాలి. ఇక్కడ గమనించాల్సిన విషయం ‘ఫస్ అలూహున్న’ అనేది అమ్ర్ (ఆర్డర్, ఆదేశం). అంతేకాకుండా ‘మివ్ వరా’ఇ హిజాబ్’ అని చెప్పాడు అల్లాహ్ త’ఆలా. ఇది డైరెక్ట్ ఆదేశమే ఉన్నది. ఇక ఖుర్ఆన్లో ఎక్కడా కూడా పరదా ఆదేశం లేదు అని అంటారు? ఇది వారి యొక్క అజ్ఞానం. వాస్తవానికి ఇది వారి యొక్క అజ్ఞానం.
అలాగే సోదర మహాశయులారా, సోదరీమణులారా, మరొక విషయం చాలా స్పష్టంగా తెలుసుకోండి. ఆయత్ నంబర్ 59 లో కనబడుతుంది. అక్కడ అల్లాహ్ త’ఆలా అంటున్నాడు,
قُلْ (ఖుల్) “ఓ ప్రవక్త, మీరు చెప్పండి.” (33:59)
వారికి ఆదేశం ఇవ్వండి. ఎంత స్పష్టంగా ఉంది! చెప్పండి, ఆదేశం ఇవ్వండి,
ఆదేశం ఇవ్వండి అని ఇంత స్పష్టంగా ఉన్న తర్వాత, ఇది ఇష్టంపై ఆధారపడి ఉంది అని ఎలా చెప్పగలుగుతాము? మరియు వాటన్నిటికంటే ముందు ఎక్కడైనా ఏదైనా అవసరంతో ఎవరైనా స్త్రీ బయటికి వెళ్లాలంటే స్త్రీల యొక్క చూపులు ఎక్కడ ఉండాలి? పురుషుల యొక్క చూపులు ఎక్కడ ఉండాలి? సూరతున్ నూర్, ఆయత్ నంబర్ 31లో స్పష్టంగా చెప్పడం జరిగింది.
మన యొక్క ఈనాటి అంశం పరదా గురించి కాదు, కానీ మాట వచ్చింది గనుక కొన్ని వివరాలను మీకు తెలియజేశాను. ఇవి సరిపోతాయి, మరిన్ని మీరు అక్కడ లింక్ ని క్లిక్ చేసి ఇన్షాఅల్లాహ్ తెలుసుకోవచ్చు. ప్రత్యేకంగా ‘సాధనాలను’ అని ఏదైతే మీరు పదం చూస్తున్నారో రెడ్ కలర్ లో, దాన్ని క్లిక్ చేస్తే పరదాకు సంబంధించిన పూర్తి ఒక వీడియో మీకు ఇన్షాఅల్లాహ్ ఓపెన్ అవుతుంది.
వ్యభిచారం వరకు చేరవేసే సాధనాలను, అక్కడి వరకు కూడా చేరుకోకూడదు అని అల్లాహ్ త’ఆలా పరదా యొక్క ఆదేశం చాలా స్పష్టంగా ఇచ్చాడు. చూపులను క్రిందికి ఉంచాలి అని ఆదేశం ఇచ్చాడు. పరస్త్రీలతో ఒంటరిగా, ఏకాంతంలో ఉండడాన్ని నిషేధించాడు. అంతేకాదు, ఆ తర్వాత కూడా ఎవరైనా ఇన్ని కండిషన్లను దాటేసి, మితిమీరి వ్యభిచారానికి పాల్పడ్డాడంటే, ఇక వారికి శిక్ష విధించడం జరిగింది. ఈ శిక్ష వారు చేసుకున్న కర్మలకు ఫలితంగా మరియు ఆ శిక్ష అందరి ముందు ఇవ్వాలని చెప్పడం జరిగింది, ఇతరులందరికీ కూడా గుణపాఠం లభించాలని.
వ్యభిచారానికి శిక్షలు
శ్రద్ధగా వినండి. వివాహితుడైన వ్యభిచారికి అతి కఠినమైన శిక్ష విధించింది ఇస్లాం. అతను చనిపోయేవరకు అతనిపై రాళ్లు రువ్వబడాలి. ఎందుకంటే తాను చేసిన చెడు కార్యపు ఫలితాన్ని అతడు చవి చూడాలి. అతని శరీరము యొక్క ప్రతీ భాగం, అంగం ఆ నిషిద్ధ కార్యం చేస్తూ ఎలా సుఖాన్ని అనుభవించినదో, అలాగే ఈ శిక్ష ద్వారా బాధను, నొప్పిని అనుభవించాలి. ఇది ఎవరి కొరకు? వివాహితుడైన, పెళ్లి అయిన తర్వాత భార్యతో అతడు సంసారం చేసేసాడు, ఆ తర్వాత మళ్లీ వ్యభిచారానికి పాల్పడ్డాడు, అలాంటి వానికి ఈ శిక్ష.
కానీ ఇక ఎవరైతే వివాహం కాని వారు ఉన్నారో, వివాహం కాని వ్యభిచారిపై వంద కొరడా దెబ్బల శిక్ష విధించాలి. ఇది ఇస్లామీయ శిక్షల్లో నియమించబడిన అతి ఎక్కువ శిక్ష. వేరే కొన్ని రకాల పాపాలకు కొన్ని రకాల కొరడా దెబ్బలు ఉన్నాయి, కానీ వాటి సంఖ్య తక్కువ. ఇక్కడ వివాహం కాని యువకుడు, యువతి వ్యభిచారానికి పాల్పడితే వంద కొరడా దెబ్బల శిక్ష, ఇది చాలా ఎక్కువ సంఖ్య, ఈనాటి ఈ పాపానికే విధించబడినది.
అంతేకాదు, విశ్వాసుల సమూహ సమక్షంలో అతనిపై ఈ శిక్ష విధించి, ఆ తర్వాత పూర్తి ఒక సంవత్సరం వరకు ఈ నేరానికి పాల్పడిన స్థలం నుండి దూరం చేసి మరింత అవమానం, అగౌరవం పాలు చేయాలి. ఇది ప్రాపంచిక శిక్ష.
చెప్పేకి ముందు ఒక విషయం గుర్తుంచుకోవాలి. వివాహితునికైనా, వివాహం కాని వానికైనా ఈ శిక్ష విధించాలని ఏదైతే చెప్పడం జరిగిందో, మనం సామాన్య మనుషులం, ఎవరికి ఇష్టం ఉంటే వారు ఆ విధంగా కాదు. ఒక ప్రభుత్వం, అధికారం చేతిలో ఉన్నవారు ఈ శిక్షను విధిస్తారు.
సమాధిలో శిక్ష
ఇక రండి, ఎవరైతే ఇహలోకంలో ఏదో రకంగా తప్పించుకున్నారు, శిక్ష పడలేదు, అలాంటి వారికి సమాధిలో ఎలాంటి ఘోరమైన శిక్ష ఉంటుందో గమనించండి.
పైన ఇరుకుగా, కింద వెడల్పుగా ఉండే కుండ లాంటి ఆవంలో వారు నగ్నంగావేయబడతారు, అస్తగ్ఫిరుల్లాహ్. అల్లాహుమ్మ అజిర్నా మిన్హు. ఓ అల్లాహ్ మమ్మల్ని రక్షించు ఇలాంటి పాపాల నుండి, ఇలాంటి శిక్షల నుండి. దాని కింద అగ్ని మండుతూ ఉంటుంది. అందులో జ్వాలలను ప్రజ్వలింప జేసినప్పుడల్లా వారు అరుస్తూ దాని నుండి బయట పడడానికి పైకి వస్తారు. కానీ అప్పుడే మంటలు చల్లారి వారు మళ్ళీ లోపలికి పడిపోతారు. ఇలా పైకి రావడం, జ్వాలలు ఎగిరినప్పుడు, అవి చల్లారినప్పుడు కిందికి పోవడం, అగ్నిలో కాలుతూ ఉండడం, అరుస్తూ ఉండడం, ఇది జరుగుతూనే ఉంటుంది ప్రళయం వరకు.
క్షణాల సుఖం కొరకు సంవత్సరాల తరబడి శిక్ష, ఇది ఏదైనా బుద్ధి జ్ఞానంలో వచ్చే మాటేనా? కానీ ప్రపంచ వ్యామోహంలో పడి, స్త్రీల యొక్క ఫితనాలలో పడి ఎందరో దీనికి పాల్పడుతున్నారు. ఎందరో స్త్రీలు సోషల్ మీడియాల ద్వారా ఇలాంటి పాపానికి పాల్పడుతున్నారు. అల్లాహ్ అందరికీ హిదాయత్ ప్రసాదించుగాక.
వృద్ధాప్యంలో చేసే పాపం యొక్క తీవ్రత
పరిస్థితి మరింత ఘోరంగా మారేది ఎప్పుడు? మనిషి వృద్ధాప్యానికి చేరుకొని సమాధికి సమీపించే సమయం వచ్చినప్పటికీ, అల్లాహ్ శిక్షించకుండా అతనికి ఇచ్చిన వ్యవధిని తౌబా కొరకు, అల్లాహ్ తో మాఫీ కొరకు ఉపయోగించుకోకుండా, దుర్వినియోగం చేసుకొని వ్యభిచారంలోనే మునిగి తేలుతున్నప్పుడు. ఏంటి ఆ విషయం? వినండి హదీస్ ద్వారా. ప్రవక్త ముహమ్మద్ సల్లల్లాహు అలైహి వసల్లం హెచ్చరించారని అబూ హురైరా రదియల్లాహు అన్హు ఉల్లేఖించారు.
“ప్రళయదినాన ముగ్గురితో అల్లాహ్ మాట్లాడడు, వారిని శుద్ధపరచడు మరియు వారి వైపు చూడడు. వారికి కఠిన శిక్ష కలుగునుః వృద్ధ వ్యభిచారి. అబద్ధం పలికే రాజు. అహంకారం చూపే పేదవాడు”. (ముస్లిం 107).
గమనించారా? వృద్ధాప్యానికి చేరుకోబోతూ కూడా ఈ దుర్గుణాలకు దూరం కాకుంటే, అల్లాహ్ వైపు నుండి ఎంతటి కఠినమైన శిక్ష ఉందో గమనించండి.
వ్యభిచారం ద్వారా సంపాదన
సంపదల్లో అతి చెడ్డది వ్యభిచార సంపద. ఏ వ్యభిచారిణి తన వ్యభి చారం ద్వారా డబ్బు సంపాదిస్తుందో అర్థ రాత్రి ఆకాశ ద్వారాలు తెరువ బడే సమయాన ఆమె దుఆ స్వకరించబడదు. (సహీహుల్ జామి 2971).
ఇక దీని గురించి మరొక విషయం, సంపదల్లో అతి చెడ్డది వ్యభిచార సంపద. ఈ రోజుల్లో ఎందరో దీనిని సంపాదన మార్గంగా చేసుకున్నారు. అల్లాహ్ హిదాయత్ ఇవ్వుగాక. అయితే అలాంటి సంపద చాలా చెడ్డది. ఏ వ్యభిచారిని తన వ్యభిచారం ద్వారా డబ్బు సంపాదిస్తుందో, అర్ధరాత్రి ఆకాశ ద్వారాలు తెరువబడే సమయాన, అల్లాహ్ త’ఆలా అందరి యొక్క దుఆలను అంగీకరించే సమయాన, అల్లాహ్ త’ఆలా అందరి యొక్క రోదనలను, వారి యొక్క ఆర్ధింపులను వింటున్న సమయాన ఆ వ్యభిచారి యొక్క దుఆ స్వీకరించబడదు. అల్లాహు అక్బర్, అల్లాహు అక్బర్. ఎంత ఘోరమైన శిక్ష చూడండి ఇది కూడా. అందుకొరకు ఇలాంటి పాపాల నుండి స్వచ్ఛమైన తౌబా చేసికోవాలి.
ఇక పేదరికం, అవసరం కొందరంటారు కదా, పేదరికం ఉన్నది, ఎక్కడా మాకు ఏ మార్గం లేదు, మా బ్రతుకు తెరువు ఎలా గడవాలి, మేము చాలా గత్యంతరం లేని పరిస్థితిలో ఉన్నాము, అందుకొరకే ఈ చెడుకు పాల్పడ్డాము. అయితే, పేదరికం, అవసరం అల్లాహ్ హద్దులను మీరడానికి ఎంతమాత్రం ధార్మిక సబబు కావు. అరబ్బుల్లో జాహిలియ్యత్ లో, ఇస్లాం రాకముందు అరబ్బులో ఒక సామెత ఉండేది, “స్వతంత్రు రాలైన స్త్రీ ఆకలిగొన్నప్పుడు తన రొమ్ముల వ్యాపారం చేసి (పాలు అమ్మి) తినదు అలాంటప్పుడు తన మానాన్ని అమ్మి ఎలా తింటుంది“.
ముగింపు
నేటి కాలంలో ఈ అశ్లీల కార్యానికి ప్రతి ద్వారము తెరువబడింది. షైతాన్ తన మరియు తన అనుచరుల కుట్రలతో ఈ మార్గాలను సులభం చేశాడు. అవిధేయులు, దుష్టులు వానిని అనుసరించారు. ఇప్పుడు పరదా లేకుండా తిరగడం, చూపులు నలువైపుల్లో లేపి నిషిద్ధమైన వాటిని చూడటం, స్త్రీలు పురుషులు విచ్చలవిడిగా కలుసుకోవడం సర్వసాధారణమయ్యాయి. కామవాంఛల్ని రేకెత్తించే మ్యాగజిన్లు, నీలి చిత్రాలు సర్వసామాన్యమయ్యాయి. దుర్మార్గ ప్రదేశాలకు ప్రయాణాలు అధికమయ్యాయి. వేశ్యా గృహాలు లైసెన్సులు ఇచ్చి తెరువబడుతున్నాయి, అల్లాహు అక్బర్. ఎందుకంటే ఆర్థికంగా వారికి అందులో కమిషన్ దొరుకుతున్నాయని. మానభంగాలు పెచ్చరిల్లుతున్నాయి, అసంఖ్యాక అక్రమ సంతానాలు కలుగుతున్నాయి, అబార్షన్ల ద్వారా పిండాలను హతమార్చడం జరుగుతుంది.
ఓ అల్లాహ్, మేము నీ దయా కరుణ ద్వారా మా దుష్కార్యాల నుండి దూరం ఉండే భాగ్యం కోరుతున్నాము. ఇంకా మా హృదయాలను శుద్ధపరచి, మా మానాలను కాపాడుము, మాకు నిషిద్ధ కార్యాలకు మధ్య పటిష్టమైన అడ్డు నిలుపుము. ఆమీన్. అందుకొరకే దుఆ చేసుకుంటూ ఉండాలి.
اَللّٰهُمَّ طَهِّرْ قُلُوْبَنَا (అల్లాహుమ్మ తహ్హిర్ ఖులూబనా) ఓ అల్లాహ్ మా హృదయాలను శుద్ధిపరచు
اَللّٰهُمَّ أَحْصِنْ فُرُوْجَنَا (అల్లాహుమ్మ అహ్సిన్ ఫురూజనా) మా మర్మాంగాలను కాపాడు.
ఓ అల్లాహ్ మా చూపులను మేము కిందికి వాలించి, కిందికి వేసి ఉండే విధంగా మాపై ఎల్లప్పుడూ భాగ్యం ప్రసాదించు.
దీన్ని షేర్ చెయ్యండి మీ బంధుమిత్రులతో , బారకల్లాహు ఫీకుమ్: “మంచికి మార్గనిర్దేశం చేసేవారికి దానిని ఆచరించిన వారితో సమానమైన పుణ్యం లభిస్తుంది” [సహీహ్ ముస్లిం, 3వ భాగం, నం .4665] ఈ క్రింది లింక్ దర్శించి మీ స్నేహితులు మరియు బంధువులు మా వాట్సాప్ గ్రూపులో చేరవచ్చు: teluguislam.net/whatsapp/. మా టెలిగ్రామ్ ఛానల్ https://t.me/teluguislam .మా యూట్యూబ్ ఛానల్: youtube.com/c/teluguislam . జిక్ర్ & దుఆల కోసం కొత్త వెబ్సైటు: telugudua.net
దీన్ని షేర్ చెయ్యండి మీ బంధుమిత్రులతో , బారకల్లాహు ఫీకుమ్: “మంచికి మార్గనిర్దేశం చేసేవారికి దానిని ఆచరించిన వారితో సమానమైన పుణ్యం లభిస్తుంది” [సహీహ్ ముస్లిం, 3వ భాగం, నం .4665] ఈ క్రింది లింక్ దర్శించి మీ స్నేహితులు మరియు బంధువులు మా వాట్సాప్ గ్రూపులో చేరవచ్చు: teluguislam.net/whatsapp/. మా టెలిగ్రామ్ ఛానల్ https://t.me/teluguislam .మా యూట్యూబ్ ఛానల్: youtube.com/c/teluguislam . జిక్ర్ & దుఆల కోసం కొత్త వెబ్సైటు: telugudua.net
దొంగతనం మరియు ఇస్లాం బోధనలు https://youtu.be/htWndMP8VBQ [55 నిముషాలు] వక్త: ముహమ్మద్ నసీరుద్దీన్ జామి’ఈ (హఫిజహుల్లాహ్)
ఈ ప్రసంగంలో, దొంగతనం మరియు దానిపై ఇస్లామీయ బోధనల గురించి వివరించబడింది. దొంగతనం ఇస్లాంలో ఒక ఘోరమైన పాపంగా పరిగణించబడుతుందని, దానిని నివారించడానికి ఖురాన్ మరియు హదీసులలో స్పష్టమైన ఆదేశాలు ఉన్నాయని వక్త తెలియజేశారు. సూరహ్ అల్-మాయిదాలోని ఆయతులను ఉటంకిస్తూ, దొంగతనం చేసిన స్త్రీపురుషులకు ఇస్లామీయ ప్రభుత్వం విధించే శిక్ష గురించి, మరియు పశ్చాత్తాపపడితే అల్లాహ్ క్షమించే కారుణ్యం గురించి వివరించారు. దొంగతనం యొక్క చెడు ప్రభావాలను, ప్రవక్త ముహమ్మద్ సల్లల్లాహు అలైహి వసల్లం కాలంలోని సంఘటనలను ఉదాహరణలుగా చూపిస్తూ, ఈ చెడు గుణానికి దూరంగా ఉండాలని, ధర్మబద్ధమైన జీవితం గడపాలని ప్రబోధించారు. ఈ నేరానికి పాల్పడిన వారికి ఇహలోకంలో మరియు పరలోకంలో ఎదురయ్యే తీవ్రమైన పరిణామాల గురించి కూడా హెచ్చరించారు.
సర్వస్తోత్రాలు అల్లాహ్ కే శోభిల్లుతాయి. మేము ఆయననే స్తుతిస్తున్నాము, ఆయన సహాయాన్నే అర్థిస్తున్నాము, ఆయననే క్షమాపణ వేడుకుంటున్నాము. మా ఆత్మల కీడుల నుండి, మా దుశ్చర్యల నుండి అల్లాహ్ శరణు వేడుకుంటున్నాము. అల్లాహ్ మార్గదర్శకత్వం వహించినవానిని ఎవరూ మార్గభ్రష్టతకు గురిచేయలేరు. ఆయనచే మార్గభ్రష్టతకు గురైనవానికి ఎవరూ మార్గదర్శకత్వం చూపలేరు. అల్లాహ్ తప్ప మరెవరూ ఆరాధ్యుడు లేడని నేను సాక్ష్యమిస్తున్నాను. ముహమ్మద్ ఆయన దాసుడు మరియు ప్రవక్త అని కూడా నేను సాక్ష్యమిస్తున్నాను. ఆ తర్వాత, నిశ్యయంగా ఉత్తమమైన మాట అల్లాహ్ గ్రంథం, ఉత్తమమైన మార్గం ముహమ్మద్ సల్లల్లాహు అలైహి వసల్లం మార్గం. కార్యాలలోకెల్లా చెడ్డవి కొత్తగా కల్పించబడినవి. ప్రతి కొత్త కల్పన ఒక బిద్అత్ (ధర్మభ్రష్టత). ప్రతి బిద్అత్ ఒక మార్గభ్రష్టత. ప్రతి మార్గభ్రష్టత నరకానికి దారితీస్తుంది.
దొంగతనం మరియు ఇస్లామీయ బోధనలు
أعوذ بالله السميع العليم من الشيطان الرجيم (అవూజు బిల్లాహిస్ సమీఇల్ అలీమి మినష్ షైతానిర్ రజీమ్) సర్వశ్రోత, సర్వజ్ఞాని అయిన అల్లాహ్ శరణు వేడుకుంటున్నాను, శపించబడిన షైతాన్ నుండి.
وَالسَّارِقُ وَالسَّارِقَةُ فَاقْطَعُوا أَيْدِيَهُمَا جَزَاءً بِمَا كَسَبَا نَكَالًا مِّنَ اللَّهِ ۗ وَاللَّهُ عَزِيزٌ حَكِيمٌ దొంగతనం చేసినది – పురుషుడైనా, స్త్రీ అయినా – ఉభయుల చేతులూ నరకండి. అది వారు చేసిన దానికి ప్రతిఫలం. అల్లాహ్ తరఫున విధించబడిన శిక్ష. అల్లాహ్ సర్వాధిక్యుడు, వివేచనాశీలి కూడా. (5:38)
فَمَن تَابَ مِن بَعْدِ ظُلْمِهِ وَأَصْلَحَ فَإِنَّ اللَّهَ يَتُوب عَلَيْهِ ۗ إِنَّ اللَّهَ غَفُورٌ رَّحِيمٌ పాపం చేసిన తరువాత పశ్చాత్తాపం చెంది, తన నడవడికను సరిదిద్దుకున్నవాని వైపుకు అల్లాహ్ కారుణ్యంతో మరలుతాడు. నిస్సందేహంగా అల్లాహ్ క్షమాభిక్షపెట్టేవాడు, కరుణించేవాడూను. (5:39)
أَلَمْ تَعْلَمْ أَنَّ اللَّهَ لَهُ مُلْكُ السَّمَاوَاتِ وَالْأَرْضِ يُعَذِّبُ مَن يَشَاءُ وَيَغْفِرُ لِمَن يَشَاءُ ۗ وَاللَّهُ عَلَىٰ كُلِّ شَيْءٍ قَدِيرٌ ఆకాశాల మరియు భూమి యొక్క రాజ్యాధికారం అల్లాహ్దే నన్న సంగతి నీకు తెలియదా? ఆయన తాను తలచిన వారిని శిక్షిస్తాడు, తాను తలచినవారిని క్షమిస్తాడు. అల్లాహ్ అన్నింటిపై తిరుగులేని అధికారం కలవాడు.(5:40)
సర్వ స్తోత్రములు, అన్ని రకాల పొగడ్తలు, అన్ని రకాల గొప్పతనాలు కేవలం ఏకైక సృష్టికర్త మరియు మనందరి ఏకైక ఆరాధ్యుడైన అల్లాహ్ కు మాత్రమే శోభిస్తాయి.
ప్రియ వీక్షకుల్లారా! సోదర సోదరీమణులారా! ఈరోజు మన అంశం దొంగతనం మరియు ఇస్లామీయ బోధనలు. దొంగతనం మరియు ఇస్లామీయ బోధనలు ఈ అంశాన్ని పురస్కరించుకొని నేను సూరతుల్ మాయిదా, సూర నెంబర్ ఐదు, ఆయత్ నంబర్ 38 నుండి 40 వరకు మూడు ఆయతులు తిలావత్ చేశాను. నేను తిలావత్ చేసినటువంటి ఈ ఆయతుల అనువాదం ముందు మీరు వినాలని ఆ తర్వాత మనం ఇన్షా అల్లాహ్ మన అంశంలో మరికొన్ని వివరాలు తెలుసుకుందాము.
దొంగతనం చేసినది పురుషుడైనా స్త్రీ అయినా ఉభయుల చేతులు నరకండి. అది వారు చేసిన దానికి ప్రతిఫలం, అల్లాహ్ తరఫున విధించబడిన శిక్ష, అల్లాహ్ సర్వాధిఖ్యుడు, వివేచనాశీలి కూడా. (5:38)
పాపం చేసిన తరువాత పశ్చాత్తాపం చెంది, తన నడవడికను సరిదిద్దుకున్నవాని వైపుకు అల్లాహ్ కారుణ్యంతో మరలుతాడు. నిస్సందేహంగా అల్లాహ్ క్షమాభిక్షపెట్టేవాడు, కరుణించేవాడూను. (5:39)
ఆకాశాల మరియు భూమి యొక్క రాజ్యాధికారం అల్లాహ్దే నన్న సంగతి నీకు తెలియదా? ఆయన తాను తలచిన వారిని శిక్షిస్తాడు, తాను తలచినవారిని క్షమిస్తాడు. అల్లాహ్ అన్నింటిపై తిరుగులేని అధికారం కలవాడు. (5:40)
పాపం చేసిన తర్వాత పశ్చాత్తాపం చెంది, ఇక్కడ ఈ అనువాదం చాలా శ్రద్ధగా గమనించండి.
فَمَن تَابَ مِن بَعْدِ ظُلْمِهِ ఈ దుర్మార్గానికి పాల్పడిన తర్వాత పశ్చాత్తాపపడి
అని ఇక్కడ అరబీలో అల్లాహుతాలా ఖురాన్ లో జుల్మ్ అన్న పదం చెప్పాడు. దీనికి పాపం అన్న ఒక భావం కూడా వస్తుంది. మరియు సర్వసామాన్యంగా జుల్మ్, హక్కు గల వారి నుండి వారి హక్కును దోచుకోవడం, తీసుకోవడం, లాక్కోవడం మరియు అలాగే దౌర్జన్యం, అన్యాయం ఈ భావాల్లో కూడా వస్తుంది.
అల్లాహ్ ఏమంటున్నాడు? ఈ దౌర్జన్యానికి ఈ పాపానికి దొంగతనం లాంటి చెడ్డ గుణానికి పాల్పడిన తర్వాత నిజంగా అతను పశ్చాత్తాపం చెంది అల్లాహ్ వైపునకు మరలి క్షమాపణ కోరుకొని وَأَصْلَحَ (వ అస్లహ) తన నడవడికను సరిదిద్దుకున్న వాని వైపుకు అల్లాహ్ కారుణ్యంతో మరలుతాడు. నిస్సందేహంగా అల్లాహ్ క్షమాభిక్ష పెట్టేవాడు, కరుణించేవాడు. ఆకాశాల మరియు భూమి యొక్క రాజ్యాధికారం అల్లాహ్ దే నన్న సంగతి నీకు తెలియదా? ఆయన తాను తలచిన వారిని శిక్షిస్తాడు, తాను తలచిన వారిని క్షమిస్తాడు. అల్లాహ్ అన్నింటిపై తిరుగులేని అధికారం కలవాడు.
సోదర మహాశయులారా! మనం ఏ అంశంపై చదవదలుచుకున్నా, వినదలుచుకున్నా, ఏ అంశం పైనైనా మనం మాట్లాడదలుచుకున్నా, ఖురాన్ మరియు హదీసులో దాని గురించి ఏముంది? సహాబాలు ఆ అంశాన్ని ఎలా అర్థం చేసుకున్నారు? దీనిని మనం అన్నింటికంటే ముందు పెట్టి ఆ అంశాన్ని పరిశీలించాలి, అధ్యయనం చేయాలి, అర్థం చేసుకోవాలి, చదవాలి, చదివించాలి, వినాలి, వినిపించాలి.
ఈ ఆయత్ యొక్క వివరణ ఇన్షా అల్లాహ్ మరి కొన్ని క్షణాల్లో ముందుకు రానున్నది. అయితే రండి. మన ఈనాటి అంశం దొంగతనం మరియు ఇస్లాం బోధనలు. ఈ రోజుల్లో ఎన్నో రకాల రంగాలలో దొంగతనం యొక్క ఎన్నో రకాలు చాలా ప్రబలిపోయి ఏవైతే ఉన్నాయో, దానిని అంతమొందించి, ఈ చెడు గుణాన్ని నిర్మూలించాలంటే ఇస్లాం మాత్రమే సరియైన మంచి పరిష్కారం. అయితే ఒక రెండు పలుకుల్లో చెప్పాలంటే దొంగతన నిర్మూలానికి, దొంగతనం లాంటి చెడు గుణం దూరం కావడానికి ఇస్లామే సరియైన పరిష్కారం.
ఎందుకంటే ఇస్లాం ధర్మం అన్ని రకాల ప్రజలపై ఉన్నటువంటి భారాలను దించి వేయడానికి, వారు ఎదుర్కొంటున్నటువంటి సామాజిక రుగ్మతలను, వారు ఏ సామాజిక రుగ్మతలలో కొట్టుమిట్టాడుతున్నారో చాలా ఇబ్బందికి మరియు కష్టానికి గురై ఉన్నారో వాటి మంచి ఉత్తమ పరిష్కారం ఇస్లాం తెలియజేసింది. ఇస్లాం కొన్ని హద్దులు, ఉదాహరణకు, దొంగతనానికి, వ్యభిచారానికి, ఏ ఆధారం లేకుండా ఒకరిపై వారి మానభంగం, వారి యొక్క పరువు విషయంలో జోక్యం చేసుకొని అపనిందలు వేసే వారిపై కొన్ని రకాల శిక్షలు ఏదైతే విధించినదో, మరియు ఇస్లామీయ పరిభాషలో వాటిని الْحُدُود (అల్ హుదూద్) అని అంటారో, ఈ హద్దులు ఏవైతే నిర్ణించబడ్డాయో, ఈ శిక్షలు ఏవైతే నిర్ణయించబడ్డాయో, ఎవరి మనసులలో రోగాలు ఉన్నాయో అవి బాగుపడడానికి, జనులపై అల్లాహ్ వైపు నుండి కరుణగా అవి వచ్చాయి. మరియు చివరికి హత్యకు బదులుగా హత్య అన్నటువంటి ఏ హక్కైతే ఇస్లాం ప్రభుత్వాలకు ఇచ్చినదో, ఇందులో కూడా బుద్ధిమంతులకు, జ్ఞానవంతులకు ఎంతో గొప్ప గుణపాఠం ఉన్నది.
وَلَكُمْ فِي الْقِصَاصِ حَيَاةٌ يَا أُولِي الْأَلْبَابِ (వలకుమ్ ఫిల్ ఖిసాసి హయాతున్ యా ఉలిల్ అల్బాబ్) ఇందులో వాస్తవానికి ఒక జీవనం ఉన్నది. దీనిని బుద్ధిమంతులు మాత్రమే గ్రహించగలరు.
అని అల్లాహుతాలా స్పష్టంగా తెలియజేస్తున్నాడు. అలాగే, ఎవరైతే ఒకరి సొమ్మును దొంగతనంగా, ఒకరి హక్కును దొంగతనంగా కాజేసుకుంటారో, అలాంటి వారి యొక్క చేతులను నరకాలి అని ఏదైతే శిక్ష వచ్చిందో, అది కూడా ప్రజల యొక్క సొమ్ము, వారి యొక్క ధనం, వారి యొక్క హక్కులు భద్రంగా ఉండాలని. అలాగే మనం ఇంకా ఇతర ఎన్నో రకాల హద్దులను ఏదైతే చూస్తున్నామో, వాస్తవానికి ఇందులో ప్రజల కొరకు ఎంతో మేలు ఉంది.
కొన్ని సందర్భాల్లో మనకు ఇస్లాం యొక్క జ్ఞానం తక్కువ ఉండడం వల్ల ఏదైనా ఒక శిక్ష గురించి అయ్యో, ఇంత చిన్న పాపానికి ఇంత పెద్ద శిక్షనా అన్నట్లుగా కొందరు భావిస్తారు. కానీ దాని యొక్క సంపూర్ణ జ్ఞానం లభించినదంటే అది వాస్తవానికి మేలు అన్న విషయాన్ని గ్రహిస్తారు.
సమాజంలో దొంగతనం అనే చెడు
సోదర మహాశయులారా! సోదరీమణులారా! సమాజంలో ప్రబలి ఉన్నటువంటి ఎన్నో రకాల చెడులలో ఒకటి, ఒక చెడు దొంగతనం. దొంగతనం ఇళ్లల్లో పిల్లలు వారి చిన్న వయసు నుండి చేయడం ఏదైతే మొదలు పెడతారో, ఈ దురలవాటు వారు వయసు వారైన తర్వాత పెద్ద పెద్ద దొంగతనాలకు పాల్పడుతూ ఉంటారు. చివరికి ఇది సమాజానికే ఎంతో వినాశకరంగా మారుతుంది.
అయితే దొంగతనం గురించి మనం తెలుసుకోవలసిన మొట్టమొదటి విషయం ఏమిటంటే, ఇది ఘోర పాపాల్లోని ఒక పాపం. ఎవరైతే దొంగతనానికి పాల్పడుతున్నారో, వారు గ్రహించాలి. ఆ దొంగతనం ఏదైనా చిన్న వస్తువుది చేసినా, ఏదైనా పెద్ద వస్తువుది చేసినా, దొంగతనం చేయబడినటువంటి ఆ వస్తువు దానికి ఎంతో పెద్ద రేట్ ప్రైస్ వెల ఉన్నా లేకపోయినా, ఇక్కడ ముందు గమనించవలసిన విషయం అల్లాహ్ దొంగతనాన్ని నిషిద్ధపరిచాడు. ఎందుకంటే ఇస్లాం ధర్మం, ధర్మాన్ని, మానవుల యొక్క మానాన్ని, పరువును, వారి యొక్క ధనాన్ని అన్ని రకాలుగా వారికి భద్రత ఇస్తుంది. మరియు దొంగతనం అనేది వారి ఆర్థిక విషయాల్లో ఇంకా వేరే రకంగా కూడా వారికి అన్యాయం ఇందులో జరుగుతుంది గనక ఇస్లాం దీనిని నిషిద్ధపరిచింది.
అయ్యో చిన్నదే కదా అని ఎవరైతే కొందరు అనుకుంటారో, ఇక్కడ వారు గమనించాలి. గొప్పవాడైనటువంటి అల్లాహ్ అజ్జవజల్లా యొక్క ఆదేశానికి వ్యతిరేకం చేస్తున్నారు. అతని ఆజ్ఞ పాలన చేయడం లేదు. ఇది చాలా ఘోరమైన పాపం అన్న విషయాన్ని గ్రహించాలి.
అందుకొరకే సుమారు మొత్తమొక సూరాగా ప్రవక్త సల్లల్లాహు అలైహి వసల్లం జీవితంలో సుమారు చివరిగా అవతరించినటువంటి సూరతుల్ మాయిదా, దాని ఆయత్ నెంబర్ 38లో అల్లాహుతాలా ఇలాంటి దుశ్చేష్టకు పాల్పడే వారి చేతులను నరకాలి. ఆ దొంగతనం చేసేవారు పురుషుడైనా, స్త్రీ అయినా, ఇద్దరికీ ఈ శిక్ష పడాలి అని చాలా స్పష్టం చేశారు.
మరి ఇక్కడ గమనించవలసిన విషయం ఆయత్ యొక్క చివరిలో:
وَاللَّهُ عَزِيزٌ حَكِيمٌ (వల్లాహు అజీజున్ హకీమ్) అల్లాహ్ సర్వాధిక్యుడు, వివేచనాశీలి కూడా.
నేను మాటిమాటికి చెబుతూ ఉంటాను కదా. ఖురాన్లో ఎక్కడైతే అల్లాహ్ యొక్క పేర్లు వస్తున్నాయో, ఆయత్ యొక్క చివరిలో ఆ పూర్తి ఆయత్ యొక్క భావాన్ని దృష్టిలో పెట్టుకొని అల్లాహ్ యొక్క పేర్లు ఏవైతే వచ్చాయో, వాటిపై అవగాహన, పరిశీలన, దూరపు ఆలోచన, తదబ్బుర్, తఫక్కుర్ చాలా అవసరం.
ఎందుకంటే, ఇందులోనే గమనించండి. అల్లాహుతాలా దొంగతనం చేసేవారు పురుషులైనా, స్త్రీ అయినా వారి యొక్క చేతులను నరకండి. ఇది వారు చేసినటువంటి పాపానికి ఒక శిక్ష అని ఏదైతే అంటున్నాడో, వెంటనే ఏమన్నాడు? వల్లాహు అజీజున్ అంటే ఏంటి? అల్లాహుతాలా చాలా అధికారం గలవాడు. ఎలాంటి? అతనికి ఎలాంటి సర్వాధికారం ఉన్నది అంటే అతడు ఒక ఆదేశం ఇచ్చాడంటే దానికి తిరుగు అనేది ఉండదు. ఎవరైతే అతని ఆ ఆదేశానికి వ్యతిరేకంగా చేస్తాడో అతడే నష్టంలో పడిపోతాడు. ఇక హకీం, చూడడానికి ఇక్కడ ఒక మనిషి చెయ్యిని నరికి వేయడం జరుగుతుంది. ఇలాంటి ఆదేశం అల్లాహ్ ఇస్తాడా? హకీం అతడు సంపూర్ణ వివేకం గలవాడు. అతడు ఇచ్చినటువంటి ఈ ఆదేశంలో ఎన్నో వివేకవంతమైన విషయాలు, బోధనలు ఉన్నాయి. ఇందులో చాలా గొప్ప హితోపదేశాలు ఉన్నాయి. వాటిని గమనించే ప్రయత్నం చేయాలి. అల్లాహ్ కు వ్యతిరేకంగా ఏ మాట పలకరాదు.
దొంగతనం సమాజానికి చాలా నష్టం చేకూర్చునది గనక ఇస్లాంలో వచ్చే వారితో ప్రవక్త మహానీయం ముహమ్మద్ సల్లల్లాహు అలైహి వసల్లం వారు షిర్క్ చేయకూడదు అన్నటువంటి వాగ్దానం ఏదైతే తీసుకునేవారో, దొంగతనం చేయకూడదు, వ్యభిచారం చేయకూడదు అన్నటువంటి ఇలాంటి చెడు గుణాలు చేయకుండా పవిత్రంగా ఉంటారన్నటువంటి వాగ్దానం కూడా తీసుకునేవారు.
దీనికి సంబంధించి సహీ బుఖారీ మరియు సహీ ముస్లింలలో చాలా స్పష్టంగా హదీస్ వచ్చి ఉంది. సహీ బుఖారీలోని హదీస్ నెంబర్ 18, సహీ ముస్లింలోని 1709 హదీసులు గమనిస్తే ఉబాదా బిన్ సామిత్ రదియల్లాహు తాలా అన్హు తెలుపుతున్నారు. ప్రవక్త సల్లల్లాహు అలైహి వసల్లం చుట్టూ సహాబాలు కూర్చుని ఉన్నారు. ప్రవక్త వారు చెప్పారు,
“బైఅత్ చేయండి, శపదం చేయండి, మీరు ఏ మాత్రం అల్లాహ్ తో పాటు ఇతరులను భాగస్వామిగా చేయరు, షిర్క్ చేయరు అని. దొంగతనం చేయరు అని. వ్యభిచారం చేయరు అని. మీ సంతానాన్ని హతమార్చరని. మీరు ఎవరిపై ఎలాంటి అపనింద వేయరు అని. మరియు మేలు విషయాల్లో ఏ ఆదేశం నేను మీకు ఇస్తున్నానో, దానికి మీరు అవిధేయత పాటించరని కూడా వాగ్దానం చేయండి“
గమనిస్తున్నారా? ఎలా వాగ్దానం తీసుకునేవారు ప్రవక్త సల్లల్లాహు అలైహి వసల్లం. ఈ వాగ్దానం కేవలం పురుషులతోనే కాదు, స్త్రీలతో కూడా తీసుకునేవారు. ముస్లిం షరీఫ్ లోని ఈ హదీస్ ని గమనించండి, 1866. అల్లాహుతాలా సూరతుల్ ముమ్తహినా ఆయత్ నెంబర్ 12లో దీని ప్రస్తావన చేశారు.
ఓ ప్రవక్తా! విశ్వసించిన స్త్రీలు నీ వద్దకు వచ్చి, తాము ఎవరినీ అల్లాహ్ కు భాగస్వామ్యం కల్పించబోము అనీ, దొంగతనం చేయబోము అనీ, వ్యభిచారానికి పాల్పడబోము అనీ, తమ సంతానాన్ని చంపబోము అనీ, తమ కాళ్ళు చేతుల మధ్య నుండి ఎలాంటి అభాండాన్నీ కల్పించబోము అనీ, ఏ సత్కార్యంలోనూ నీకు అవిధేయత చూపబోము అని ప్రమాణం చేస్తే నువ్వు వారి చేత ప్రమాణం చేయించు. వారి క్షమాపణ కొరకు అల్లాహ్ ను ప్రార్ధించు. నిశ్చయంగా అల్లాహ్ క్షమాశీలి, దయాశీలి. (60:12)
ఆయిషా రదియల్లాహు తాలా అన్హా తెలుపుతున్నారు, ప్రవక్త సల్లల్లాహు అలైహి వసల్లం స్త్రీలతో కూడా ఇలాంటి శపదం తీసుకునేవారు. కానీ ఏం జరిగేది? ప్రవక్త మహానీయం ముహమ్మద్ సల్లల్లాహు అలైహి వసల్లం పురుషులతో వాగ్దానం తీసుకునే సందర్భంలో చేతిలో చేయి వేసి వారితో శపదం తీసుకునేవారు. కానీ స్త్రీలతో ఏ మాత్రం చేయి ముట్టుకునేవారు కాదు. ఆయిషా రదియల్లాహు అన్హా చెప్పారు,
وَاللَّهِ مَا مَسَّتْ يَدُ رَسُولِ اللَّهِ صَلَّى اللَّهُ عَلَيْهِ وَسَلَّمَ يَدَ امْرَأَةٍ قَطُّ (వల్లాహి మా మస్సత్ యదు రసూలిల్లాహి సల్లల్లాహు అలైహి వసల్లం యదంరఅతిన్ కద్) ఎప్పుడు కూడా, ఎన్నడూ కూడా ప్రవక్త సల్లల్లాహు అలైహి వసల్లం వారి యొక్క శుభ హస్తం ఏ పరాయి స్త్రీని తాకలేదు, ఏ పరాయి స్త్రీ యొక్క చేతిని అంటుకోలేదు, ముట్టలేదు.
غَيْرَ أَنَّهُ يُبَايِعُهُنَّ بِالْكَلَامِ (గైర అన్నహు యుబాయి ఉహున్న బిల్ కలాం) ప్రవక్త సల్లల్లాహు అలైహి వసల్లం నోటి మాట ద్వారానే వారితో శపదం తీసుకునేవారు.
అయితే ఇక్కడ గమనించవలసిన విషయం ఏంటి? దొంగతనం ఎంతటి చెడ్డ దురలవాటు, కొన్ని సందర్భాలలో ఇస్లాంలో ప్రవేశించే స్త్రీ పురుషులందరితో కూడా దీని గురించి వాగ్దానం తీసుకోబడేది. దీని ద్వారా ఈ చెడు గుణం యొక్క చెడుతనం అర్థమవుతుంది కదా? అలాగే సోదర మహాశయులారా, సోదరీమణులారా, ఈ దొంగతనం అన్నది ఎంతటి చెడ్డ గుణం అంటే,
وَمَا أَرْسَلْنَاكَ إِلَّا رَحْمَةً لِّلْعَالَمِينَ (వమా అర్సల్నాక ఇల్లా రహమతల్ లిల్ ఆలమీన్) సర్వ లోకాల కొరకు మేము మిమ్మల్ని కారుణ్య మూర్తిగా పంపాము
అని ఎవరి గురించైతే అల్లాహ్ తెలుపుతున్నాడో, అలాంటి కారుణ్య మూర్తి ప్రవక్త సల్లల్లాహు అలైహి వసల్లం దొంగతనం చేసే వారిని لَعْنَة (లఅనత్) చేశారు, శపించారు, ఏం చెప్పారు? సహీ హదీసులో వచ్చి ఉంది. సహీ బుఖారీ 6783 మరియు సహీ ముస్లిం 1687.
لَعَنَ اللَّهُ السَّارِقَ (లఅనల్లాహు స్సారిక్) దొంగతనం చేసే వారిని అల్లాహ్ శపించాడు.
ఇలా కూడా వస్తుంది దీని భావం. దొంగతనం చేసే వారిని అల్లాహ్ శపించుగాక.
అల్లాహ్ శపించుగాక అంటే ఏంటో అర్థం తెలుసా మీకు? అల్లాహ్ అతన్ని తన కారుణ్యం నుండి దూరం చేయుగాక. అల్లాహ్ యొక్క కారుణ్యం ఇలాంటి చెడు గుణానికి పాల్పడే వారికి అల్లాహ్ యొక్క దయ, కరుణ ఏదీ కూడా లభించకుండా ఉండాలి.
بِسْمِ اللَّهِ الرَّحْمَٰنِ الرَّحِيمِ (బిస్మిల్లాహిర్రహ్మానిర్రహీం) అని మాటిమాటికి మనం చదువుతుంటాము. ఏంటి? అల్లాహ్ యొక్క రెండు గుణాలు అందులో వచ్చాయి. الرَّحْمَٰن (అర్రహ్మాన్) الرَّحِيم (అర్రహీం). ప్రవక్త మహానీయం ముహమ్మద్ సల్లల్లాహు అలైహి వసల్లం رَءُوفٌ رَحِيمٌ (రఉఫుర్రహీం). కానీ దొంగతనం ఎంత చెడ్డ గుణం, అలాంటి వారి గురించి ప్రవక్త శపించారు, అలాంటి వారిపై అల్లాహ్ యొక్క శాపం పడుతుంది.
ఇక ఇంత విన్న తర్వాత ఎవరైనా తనకు తాను అల్లాహ్ యొక్క శాపానికి గురి చేసుకోవడం ఇది మంచిదేనా ఒకసారి గమనించండి. దొంగతనం ఎంత చెడ్డ గుణం, దీనికి పాల్పడే వారికి ఇతర పాపాలు, ఇతర నేరాలతో పాటు ఈ దొంగతనానికి పాల్పడినందుకు ప్రవక్త సల్లల్లాహు అలైహి వసల్లం కొందరికి ఎలాంటి శిక్ష ఇచ్చారో ఒక్కసారి గనక మీరు గమనించారంటే, సహీ బుఖారీ, సహీ ముస్లింలో వారి ప్రస్తావన వచ్చి ఉంది.
ఉకల్ లేదా ఉరైనా కబీలాకు సంబంధించిన కొంత మంది మదీనాలో వచ్చారు. అక్కడి వాతావరణం వారికి అనుకూలంగా లేకుండినది. అనారోగ్యానికి పాలయ్యారు. వారి యొక్క రోగాన్ని బట్టి ప్రవక్త సల్లల్లాహు అలైహి వసల్లం ఒంటెలు కట్టే చోట ఏదైతే ఉంటుందో, మదీనా సిటీకి కొంచెం దూరంలో, అక్కడికి వారిని పంపి కొంచెం బయటి ప్రాంతంలో, బయటి వాతావరణంలో అక్కడ ఉండండి, ఆ ఒంటె యొక్క పాలు మరియు దాని యొక్క మూత్రం మీ ఈ రోగానికి ఒక మంచి చికిత్స అని తెలియజేశారు. అయితే వారు కొద్ది రోజులు అక్కడ ఉన్నారు. ఆ తర్వాత ఆరోగ్యవంతులైపోయారు. వారికి స్వస్థత కలిగింది. చూడండి, ఉపకారానికి అపకారము చేయరాదు అని చదువుకుంటూ ఉంటాము కదా మనం. కానీ దీనికి విరుద్ధంగా వారేం చేశారు? ఆ ఒంటెల కాపరి అక్కడ ఎవరైతే ఉన్నారో, ఆ ఒంటెల కాపరిని హతమార్చి, ఒంటెలు దొంగతనం చేసి మరియు అరాచకం చేసి అక్కడి నుండి పారిపోయారు. పొద్దు పొద్దున్న ఈ నేరాలు, ఈ ఘోర పాపాలకు గురై అక్కడి నుండి పారిపోయారు అన్న విషయం ప్రవక్తకు తెలిసింది. ప్రవక్త సల్లల్లాహు అలైహి వసల్లం కొంతమంది వీరులను వారిని పట్టుకోవడానికి పంపారు. సహాబాలు, వీరులు వారిని గాలించి, వెతికి పట్టుకొని ప్రవక్త సల్లల్లాహు అలైహి వసల్లం వద్దకు తీసుకొచ్చారు. ప్రవక్త సల్లల్లాహు అలైహి వసల్లం పగటి పూట రాకముందే వారిని పట్టుకోవడం జరిగింది. ఆ తర్వాత వారి ఒక చెయ్యిని, ఒక కాలును నరికి వేయడంతో పాటు వారికి ఘోరమైన శిక్ష విధించడం జరిగింది. మరియు ఒకచోట ఎక్కడైతే సౌకర్యాలు లేవో అక్కడ వారిని వదలడం జరిగింది.
అబూ కిలాబా రహిమహుల్లాహ్ ఈ హదీస్ ను ఉల్లేఖించిన వారు, ఒక తాబియీ చెబుతున్నారు, فَهَؤُلَاءِ (ఫహా ఉలా) ఈ ముజ్రిమీన్, ఈ క్రిమినల్ పర్సన్స్,
سَرَقُوا (సరకూ) దొంగతనానికి పాల్పడ్డారు,
وَقَتَلُوا (వకతలూ) హత్య నేరానికి పాల్పడ్డారు,
وَكَفَرُوا بَعْدَ إِيمَانِهِمْ (వకఫరూ బాద ఈమానిహిం) విశ్వాసం తర్వాత అవిశ్వాసానికి పాల్పడ్డారు,
وَحَارَبُوا اللَّهَ وَرَسُولَهُ (వహారబుల్లాహ వరసూల) అల్లాహ్ మరియు ప్రవక్తకు వ్యతిరేకంగా యుద్ధానికి సిద్ధమయ్యారు.
గమనిస్తున్నారా? ఈ నేరాలలో ఒకటి ఏముండినది? దొంగతనం కూడా ఉండినది. ఇక అల్లాహుతాలా వారికి ఎలాంటి శిక్ష ఇచ్చాడో, ప్రవక్త సల్లల్లాహు అలైహి వసల్లం వారిపై ఎలాంటి శిక్ష విధించారో విన్నారు.
నమాజులో ప్రవక్తకు చూపబడిన దృశ్యాలు
అందుకే సోదర మహాశయులారా, ఇక్కడి వరకే సరిపోదు, ఒకవేళ దొంగతనం చేసే వ్యక్తి స్వచ్ఛమైన తౌబా చేసి తన మనసును పరిశుభ్రం చేసుకొని అల్లాహ్ తో భయపడి ఈ తప్పిదాన్ని, ఈ పాపాన్ని వదలలేదు అంటే అతడు మరీ ఘోరాతి ఘోరమైన శిక్షకు గురి అవుతాడు. ఏంటి ఆ శిక్ష? అల్లాహు అక్బర్. గమనించండి. ఆ శిక్ష ఏమిటో, ఎలాంటి రోజు ప్రవక్త సల్లల్లాహు అలైహి వసల్లం వారికి నమాజులో ఉండగా ఇలాంటి పాపానికి పాల్పడే వారి శిక్ష నరకంలో ఏముందో అది చూపించబడింది అంటే ఆ సిచువేషన్, ఆ సందర్భాన్ని మీరు గ్రహించండి. ఈ దొంగతనం లాంటి చెడ్డ గుణం ఎంత చెడ్డదో అర్థం చేసుకోండి.
అనేక హదీసుల్లో వచ్చిన విషయం ఏంటి? ప్రవక్త సల్లల్లాహు అలైహి వసల్లం కాలంలో ఒకసారి సూర్య గ్రహణం అయింది. ప్రవక్త సల్లల్లాహు అలైహి వసల్లం చాలా దీర్ఘంగా ఖియాం, రుకూ, సజ్దాలు చేస్తూ రెండు రకాతుల నమాజ్ చేయించారు. ఆ నమాజ్లో ప్రవక్త సల్లల్లాహు అలైహి వసల్లం వారికి స్వర్గం మరియు స్వర్గ యొక్క భోగ భాగ్యాలు పొందే కొందరు స్వర్గ వాసులను చూపించడం జరిగింది. ఏ సదాచరణ, సత్కార్యాల వల్ల ఎవరు ఏ స్వర్గ భాగ్యం పొందారో, స్వర్గంలో ఏ స్థానం పొందారో అది చూపించడం జరిగింది ప్రవక్తకు. అలాగే కొన్ని ఘోరమైన పాపాలు, నేరాలకు పాల్పడే వారిని కూడా వారు నరకంలో ఎలాంటి శిక్ష పొందుతున్నారో చూపించడం జరిగింది.
సోదర మహాశయులారా, ఆ సందర్భంలో ఏం జరిగింది? ఒకసారి మీరు గమనించారంటే ఎంత భయాందోళన కలిగే విషయం. ఆ హదీస్ యొక్క ప్రవక్త సల్లల్లాహు అలైహి వసల్లం నరకంలో ఎవరెవరిని చూశారో, ఏ ఏ పాపాలు చేసే వారిని చూశారో, కొందరి గురించి ప్రస్తావించారు. అందులో ఒకరు ఎవరు?
ఒక వ్యక్తి ప్రవక్త సల్లల్లాహు అలైహి వసల్లం వారి యొక్క రెండు ఒంటెలను దొంగతనం చేశాడు. అతన్ని చూపించడం జరిగింది. అలాగే హజ్ కొరకు వచ్చిన వారు, అల్లాహ్ యొక్క గృహం, దాని యొక్క దర్శనం కొరకు, తవాఫ్ చేయడానికి వచ్చిన వారిని దొంగలించే దొంగను కూడా అందులో చూశారు. మరియు కొందరు దొంగతనంలో కూడా తమకు తాము ఎంత హుషారీతనం, ఎంత నైపుణ్యం కలిగి ఉన్నారో అన్నటువంటి గర్వానికి గురవుతారు. అలాంటి ఒక ప్రస్తావన కూడా అక్కడ ప్రవక్త సల్లల్లాహు అలైహి వసల్లం వారు చెప్పారు. ఏంటి? ఒక దొంగ ఒక కట్టె తీసుకుని ఉంటాడు, దాని యొక్క చివరిలో కొంచెం ఇలా వంగి ఉంటుంది. హజ్ చేసే సందర్భంలో కొందరు తమ యొక్క ఏదైనా సామాన్, ఆ సామానుకు తన యొక్క ఆ కట్టెను ఇలా మెల్లగా తగిలించి, అతడు ఆ సామాను యొక్క వ్యక్తి గ్రహించకుండానే దాన్ని కింద పడేసుకొని లాక్కునే ప్రయత్నం చేసేవాడు. ఒకవేళ సామాను గల వ్యక్తి చూశాడు, గమనించాడు అంటే అయ్యో సారీ నా యొక్క కట్టె తగిలిపోయిందండి మీ సామానులో అనేవాడు. ఒకవేళ గమనించకుంటే దొంగలించి తీసుకెళ్లేవాడు. పవిత్రమైన స్థలం, సామాన్య నేరాల యొక్క పాపము, దాని యొక్క స్థానం అక్కడ ఎక్కువ పెరిగిపోతుంది హరంలో. అలాంటి చోట ఈ దొంగతనం చేసే వ్యక్తి మరియు ఇలాంటి సాకులు చెప్పుకుంటూ తనకు తాను ఎంతో హుషారీతనం చేస్తున్నాడు అన్నట్లుగా భావిస్తూ ఉన్న అలాంటి వారిని కూడా ప్రవక్త సల్లల్లాహు అలైహి వసల్లం నరకంలో చూశారు.
అంటే ఏం తెలుస్తుంది? ఎవరైతే దొంగతనానికి పాల్పడతారో స్వచ్ఛమైన తౌబా చేసి ఆ చెడు గుణానికి దూరంగా ఉండరో, ప్రళయ దినాన కూడా వారికి ఎలాంటి శిక్ష ఉందో ప్రవక్తకు ఈ లోకంలోనే చూపించడం జరిగింది.
అంతే కాదు సోదర మహాశయులారా, దొంగతనం ఎంతటి చెడ్డ గుణం అంటే, రవ్వంత విశ్వాసం ఉన్న వ్యక్తి కూడా వెంటనే తౌబా చేయాలి. దొంగతనం చేసిన సామాను అతని దగ్గర ఉంటే ఏదో ఒక రకంగా ఆ హక్కు గల వారికి, ఎవరి నుండి దొంగలించాడో వారికి ఇచ్చేసేయాలి. మరియు తన విశ్వాసాన్ని స్వచ్ఛమైనదిగా, బలమైనదిగా చేసుకునే ప్రయత్నం చేయాలి. లేదా అంటే చాలా ప్రమాదంలో పడిపోతాడు. ఏంటి విషయం? సహీ బుఖారీ 2475, సహీ ముస్లిం 57 హదీద్ నంబర్:
وَلاَ يَسْرِقُ حِينَ يَسْرِقُ وَهْوَ مُؤْمِنٌ (వలా యస్రికు హీన యస్రికు వహువ ముమిన్) దొంగతనం చేసే సందర్భంలో విశ్వాసం అతనిలో ఉండదు.
అల్లాహు అక్బర్. ఎవరైనా తనకు తాను ముస్లిం గా భావించి దొంగతనానికి పాల్పడుతున్నాడు అంటే దొంగతనం చేసే ఆ సందర్భంలో విశ్వాసం అతనిలో ఉండదు, అతని నుండి దూరమైపోతుంది. గమనిస్తున్నారా? విశ్వాసం అతనిలో ఉండజాలదు. ఏమవుతుంది? ఎక్కడికి వెళ్ళిపోతుంది? దాని యొక్క వివరాల్లోకి వెళ్లేది ఉంటే నా యొక్క అంశాన్ని పూర్తి చేయలేను. కానీ ఇంత విషయం కూడా మనం విన్నామంటే భయపడిపోవాలి. ఇది ఎంతటి చెడ్డ గుణం, ఆ పనికి ఆ చెడుకు పాల్పడిన సందర్భంలో విశ్వాసం మనలో ఉండదు.
సోదర మహాశయులారా, సోదరీమణులారా, ఇక హదీసుల్లోని వివరాల్లోకి వెళ్లి మనం చూశామంటే, అల్లాహు అక్బర్. కొన్ని కొన్ని దొంగతనాలకు ఎలాంటి శిక్షలు ఉన్నాయో, అది కూడా ప్రవక్త మహానీయం ముహమ్మద్ సల్లల్లాహు అలైహి వసల్లం వారికి తెలపడం జరిగింది, ప్రవక్త వారు వాటి నుండి మనల్ని హెచ్చరించారు.
ఒకసారి ఈ హదీస్ ను వినండి. సర్వసామాన్యంగా ఈ రోజుల్లో ఎంతో మంది ఇలాంటి దొంగతనానికి పాల్పడుతున్నారు. చాలా విచిత్రం ఏమిటంటే పెద్ద పెద్ద హోదాలలో ఉన్నవారు, రాజకీయాల్లో ఉన్నవారు, డబ్బు ధనం గలవారు, ఇంకా సామాన్య ప్రజలు కూడా ఎంతో మంది ఇలాంటి పాపానికి ఒడిగడుతున్నారు. మరి వారికి ఎంత ఘోరమైన శిక్ష ఉందో, సహీ బుఖారీ హదీస్ నెంబర్ 3198, సహీ ముస్లిం హదీస్ నెంబర్ 1610, ప్రవక్త సల్లల్లాహు అలైహి వసల్లం చెప్పారు:
مَنْ أَخَذَ شِبْرًا مِنَ الأَرْضِ ظُلْمًا فَإِنَّهُ يُطَوَّقُهُ يَوْمَ الْقِيَامَةِ مِنْ سَبْعِ أَرَضِينَ ఎవరైతే మరో వ్యక్తి భూమిలో నుండి జానెడైనా అన్యాయంగా తీసుకొంటాడో, ప్రళయ దినాన ఏడు భూముల బరువు అతని మెడలో వేయబడుతుంది.
జుల్మన్ (అతని హక్కు కాదు అది కానీ అన్యాయంగా తీసుకుంటున్నాడు, దౌర్జన్యంగా తీసుకుంటున్నాడు), ఏమవుతుంది? అతని యొక్క మెడలో ఏడు భూముల ఒక హారం లాంటిది చేసి, ఒక తౌఖ్, బంధన్ లాంటిది చేసి అతని మెడలో వేయబడుతుంది. కదిలించలేడు.
గమనించండి. జానెడు, జానెడు భూమి అన్యాయంగా తీసుకున్న వారికి ఇంత ఘోరమైన శిక్ష ఉంటే ఇక ఎవరైతే అంతకంటే ఎక్కువ తీసుకుంటున్నారో వారికి ఎలాంటి శిక్షలు ఉంటాయో గమనించండి. పంట భూముల్లో, పొలాల్లో ఇలాంటి అన్యాయాలు జరుగుతూ ఉంటాయి. ఇంకా రియల్ ఎస్టేట్ బిజినెస్ లలో అక్కడనైతే అన్యాయంగా ఎవరిదైతే అసలు భూమి ఉంటుందో వారిపై నానా రకాలుగా ఇండైరెక్ట్ గా ఎవరెవరితో ఎన్నో లంచాలు తినిపించి ఏదో అది సెంటర్ సిటీలో ఉంది, దాని యొక్క విలువ చాలా ఎక్కువగా ఉంటుంది. వారు ఓ రెండు లక్షలు వారి మూతిపై పారేస్తే ఎక్కడైనా వెళ్లి బతుకుతారు అన్నటువంటి సాకులతో, ఇంకా ఎన్నెన్నో సాకులతో భూములను కాజేసుకోవడం జరుగుతుంది. ఇంకా ఎవరైనా ఏదైనా ఇల్లు కట్టడానికి పునాది తవ్వుతున్నారు అంటే అయ్యో పక్క వానిలో భూమి నుండి ఓ జానెడే కదా వానికి ఏం తెలుస్తుంది? ఇలాంటి అన్యాయాలకు కూడా పాల్పడతారు. కానీ గమనించండి, ఎల్లవేళల్లో ఈ హదీసును దృష్టిలో ఉంచుకోవాలి. ఇది సమాధి శిక్షల్లోని ఓ శిక్ష. అంతేకాదు, ఈ దొంగతనం ఎంతటి చెడ్డ గుణం అంటే, మనిషి ఒకవేళ ఈ చెడు గుణం నుండి ఇహలోకంలోనే తౌబా చేసుకొని దూరం కాకపోతే, తాను స్వయంగా ఎంతో పశ్చాత్తాపపడుతూ ఉంటాడు. తన చావు సమయంలో, సమాధిలో మరియు ఆ తర్వాత ప్రళయ దినాన లేపబడినప్పుడు దీనికి సంబంధించి సహీ ముస్లింలోని ఒక హదీస్ను గమనించండి. హదీసు నెంబర్ : 1013, అబూ హురైరా రదియల్లాహు అన్హు ఉల్లేఖించారు :
భూమి తన గర్భంలోని నిధులను బంగారు, వెండి స్తంభాల రూపంలో బయటకు కక్కుతుంది. అప్పుడు హంతకుడు వచ్చి, ‘దీని కోసమే నేను హత్య చేశాను’ అంటాడు. బంధుత్వాలను తెంచుకున్నవాడు వచ్చి, ‘దీని కోసమే నేను బంధుత్వాలను తెంచుకున్నాను’ అంటాడు. దొంగ వచ్చి, ‘దీని కోసమే నా చెయ్యి నరకబడింది’ అంటాడు. ఆ తర్వాత వారంతా దానిని వదిలేస్తారు, దాని నుండి ఏమీ తీసుకోరు.
ఆ తర్వాత పరలోక దినాన వచ్చినప్పుడు, హంతకుడు వచ్చి ఏమంటాడు? నేను ఈ డబ్బు ధనం కొరకే, దీని ఆశలోనే అన్యాయంగా ఒకరిని హత్య చేశాను కదా అని పశ్చాత్తాప పడుతూ ఉంటాడు, బాధపడుతూ ఉంటాడు. డబ్బు ధనాల కోసం బంధుత్వాలను తెంచుకున్నవాడు ఎంతో రోదిస్తాడు, బాధపడతాడు, పశ్చాత్తాప పడతాడు. ఈ డబ్బు ధన పేరాశలో పడి నేను నా బంధుత్వాలను తెంచుకున్నాను కదా. దొంగతనం చేసి చేసిన వ్యక్తి వస్తాడు, ఏమంటాడు? ఈ డబ్బు ధన ఆశలో నేను దీనికి పాల్పడి దొంగతనం చేసినందుకు నా చేతులు నరికి వేయబడ్డాయి కదా. వారి కండ్ల ముంగట డబ్బు ధనం అంతా కనబడుతూ ఉంటుంది. అప్పుడు వారికి పశ్చాత్తాపం ఏర్పడుతుంది. దానిలో నుండి ఏ మాత్రం ఏ రవ్వంత తీసుకోరు. కానీ ఆ రోజు ఈ పశ్చాత్తాపం ఏదైనా పనికి వస్తుందా? ఆ రోజు ఈ పశ్చాత్తాపం ఏదైనా లాభం చేకూరుస్తుందా? లేదు.
సోదర మహాశయులారా! దొంగతనం ఎంత చెడ్డ గుణం అన్నది గమనించండి. ప్రవక్త మహానీయం ముహమ్మద్ సల్లల్లాహు అలైహి వసల్లం కాలంలో ఖురైష్ లో ఒక సంఘటన జరిగినది.
మఖ్జూం కబీలా అని ఒక వంశం ఉండినది. ఆ వంశాన్ని చాలా గౌరవంగా ప్రజలు చూసేవారు. అయితే వారిలో ఒక స్త్రీ ఉండినది. ఆమె ప్రజల యొక్క సామానులు అమానతుగా ఉంచుకునేది. కానీ ఎక్కడ ఏ చెడ్డ గుణం కలిగిందో, షైతాన్ ప్రేరణలో వచ్చేసింది, దొంగతనానికి పాల్పడింది. అయితే పేరుకు అంత మంచి స్త్రీ, ఎన్ని రోజుల నుండి చాలా పలుకుబడి ఉన్నది, మరియు వంశం కూడా ఆమెది చాలా పెద్ద వంశం. ఏమంటారు? అరే ఎంత పెద్ద మినిస్టర్ కదండీ, అగ్ర కులానికి చెందిన వారు కదండీ అని ఈ రోజుల్లో కూడా శిక్షలు పడకుండా తమ హోదా అంతస్తు, తమ వంశం పేరు మీద తప్పించుకునే ప్రయత్నాలు చేస్తూ ఉంటారు కదా. అలాంటి వారు కూడా మరి ఎవరి చేతిలోనైతే అధికారాలు ఉన్నాయో కేవలం కింది వారికి శిక్షలు ఇచ్చి పెద్దవారిని వదులుతూ ఉంటారో ఈ హదీసును వినాలి. ప్రవక్త సల్లల్లాహు అలైహి వసల్లం వారి వద్దకు ఆమె ప్రస్తావన వచ్చేసింది. ఇక ప్రవక్త ఆమె యొక్క చేతులు నరికి వేయడానికి శిక్ష ఇవ్వకూడదు అని ఎన్నో రకాలుగా ప్రయత్నాలు చేస్తూ ప్రవక్తకు చాలా ప్రియాతి ప్రియులైన వారిని ప్రవక్త వద్దకు పంపి సిఫారసులు చేయించడం మొదలు పెట్టారు. ప్రవక్త యొక్క ప్రియుడైన కొడుకు, అతను కూడా చాలా ప్రియుడు, ఉసామా బిన్ జైద్, అతన్ని పంపడం జరిగింది. ప్రవక్త సల్లల్లాహు అలైహి వసల్లం ఎంత కరాఖండిగా నిరాకరించారంటే ఉసామా భయపడిపోయారు. ఎందుకంటే ప్రవక్త వద్ద ఈ సిఫారసు గురించి మాట్లాడడానికి వచ్చినప్పుడు, ప్రవక్త ఇతని మాట విన్న తర్వాత ప్రవక్త యొక్క ముఖ కవళికలు మారిపోయాయి. ఆగ్రహానికి గురయ్యారు ప్రవక్త. ఏం చెప్పారు ప్రవక్త?
أَتَشْفَعُ فِي حَدٍّ مِنْ حُدُودِ اللَّهِ؟ (అతష్వఫీ హద్దిన్ మిన్ హుదూదిల్లాహ్) అల్లాహ్ నిర్ణయించిన హద్దులో, అల్లాహ్ ఏ శిక్ష విధించాడో అది పడకుండా ఉండడానికి నీవు సిఫారసు చేయడానికి వచ్చావా?
ఉసామా చాలా చాలా సిగ్గుపడి, పశ్చాత్తాపపడి ప్రవక్తతో వెంటనే
اسْتَغْفِرْ لِي يَا رَسُولَ اللَّهِ (ఇస్తగ్ఫిర్లీ యా రసూలల్లాహ్) నేను ఇలాంటి పాపానికి, ఇలాంటి తప్పుకు గురి కాను. మీరు నా గురించి క్షమాపణ కోరండి అని చెప్పారు.
అంతేకాదు, ప్రవక్త సల్లల్లాహు అలైహి వసల్లం వారి యొక్క భార్య, ఉమ్ముల్ ముమినీన్, ఉమ్మె సలమా రదియల్లాహు తాలా అన్హా వారి వద్దకు కూడా ఆమె వచ్చింది. ప్రవక్తకు సిఫారసు చేయాలన్నట్లుగా. కానీ ప్రవక్త సల్లల్లాహు అలైహి వసల్లం భార్య యొక్క మాట కూడా వినలేదు. ఆ సందర్భంలోనే ప్రవక్త వారు ఒక మాట చెప్పారు, స్వర్ణాక్షరాలతో రాయబడేవి. ఏంటి?
لَوْ أَنَّ فَاطِمَةَ بِنْتَ مُحَمَّدٍ سَرَقَتْ لَقَطَعْتُ يَدَهَا (లవ్ అన్న ఫాతిమత బిన్త ముహమ్మదిన్ సరఖత్ లఖతఅతు యదహా) ముహమ్మద్ కుమార్తె అయినటువంటి ఫాతిమా కూడా ఒకవేళ దొంగతనం చేసింది అంటే, నేను ఆమె చేతులు కూడా నరికేవాన్ని.
ఆ తర్వాత ఆ మఖ్జూమియా కబీలాకు చెందినటువంటి స్త్రీ యొక్క చేతులు నరికేయాలని ఆదేశం ఇవ్వడం జరిగింది. ఆమె చేతులు నరికి వేయడం జరిగింది. అయితే ఇక్కడ ఈ శిక్షను గ్రహించండి. మరియు ఈ రోజుల్లో కూడా తారతమ్యాలు ఏదైతే చేస్తారో శిక్ష విధించడంలో, అలాంటి వారు కూడా ప్రవక్త వారి ఈ మాటలు శ్రద్ధ వహించాలి. కానీ ఇక్కడ గమనించాల్సిన ఒక విషయం ఏమిటంటే, ప్రవక్త సల్లల్లాహు అలైహి వసల్లం ఆమెపై శిక్ష విధించారు. ఆమె ఆ శిక్ష పొందినది. కానీ తర్వాత స్వచ్ఛమైన తౌబా చేసినది. ఆయిషా రదియల్లాహు అన్హా చెబుతున్నారు,
حَسُنَتْ تَوْبَتُهَا وَتَزَوَّجَتْ (హసనత్ తౌబతహా, వతజవ్వజత్) ఆ తర్వాత ఆమె వివాహం కూడా చేసుకున్నది, చాలా మంచి జీవితం ఆమె గడిపినది.
అంటే ఇస్లాంలో ఇలాంటి గొప్ప అవకాశం కూడా ఉన్నది. ఎవరైనా వాస్తవంగా మారిపోతే, తనలో మార్పు తెచ్చుకుంటే, సంస్కరించుకుంటే ఇస్లాంలో చాలా గొప్ప స్థానం కూడా ఉన్నది. అయితే ఇక్కడ మరో విషయం ఏం తెలుస్తుంది అంటే హాకిం, ఖాదీ, జడ్జ్, ఎవరైతే శిక్ష విధించే అధికారి ఉన్నాడో అతని వద్దకు విషయం రాకముందు, దొంగ తౌబా చేసుకొని ఎవరి హక్కు ఉన్నదో వారికి ఇచ్చేస్తే ఆ హక్కు గలవారు మాఫ్ చేసేస్తే ఇక ఆ విషయం అక్కడికే అయిపోతుంది. కానీ అధికారి వద్దకు వచ్చిన తర్వాత శిక్ష అనేది తప్పనిసరిగా పడవలసిందే. దీనికి సంబంధించి కూడా మన ముందు కొన్ని హదీసులు ఉన్నాయి. ప్రవక్త సల్లల్లాహు అలైహి వసల్లం కాలంలో సునన్ నిసాయిలో వచ్చినటువంటి హదీస్, సఫ్వాన్ బిన్ ఉమయ్య చెబుతున్నారు. ఆయన కాబతుల్లాలో తవాఫ్ చేశారు, నమాజ్ చేశారు. ఆ తర్వాత తన వద్ద ఉన్నటువంటి ఒక దుప్పటి దాన్ని పెట్టుకొని తల కింద పడుకున్నారు. కానీ ఒక దొంగ వచ్చాడు. మెల్లగా దాన్ని తీశాడు.
ఎప్పుడైతే ఈ విషయం ప్రవక్త వద్దకు వచ్చిందో, ప్రవక్త సల్లల్లాహు అలైహి వసల్లం అతన్ని దొంగను పిలిచి అడిగారు. అతను ఒప్పుకున్నాడు. ప్రవక్త సల్లల్లాహు అలైహి వసల్లం అతనికి శిక్ష పడాలి అని ఆదేశించేశారు. ఆ సందర్భంలో సఫ్వాన్ బిన్ ఉమయ్య అంటున్నారు, ప్రవక్తా, ఇతని చేతులు నరికి వేయబడతాయి అని నాకు తెలిసేది ఉంటే నేను మీ వద్దకు విషయం తీసుకురాకపోయేది, అతన్ని మన్నించేసేయండి, నా వస్తువు అయితే నాకు దొరికిపోయింది కదా. ప్రవక్త చెప్పారు, వస్తువు దొరికిపోవడమే కాదు, ఇలాంటి ఈ చెడుకు గురి కాకూడదు మరోసారి. అందుకొరకే ఈ శిక్ష. దీని ద్వారా మనకు ఏం తెలుస్తుంది? ప్రవక్త సల్లల్లాహు అలైహి వసల్లం చెప్పారు అతనికి, నీవు ఇక్కడికి రాకముందే మాఫ్ చేసేసి, నీ హక్కులు తీసుకొని ఉండేది ఉంటే బాగుండు. కానీ ఇప్పుడు నీ యొక్క మాట చెల్లదు, అతనికి శిక్ష పడవలసిందే.
దీంతో తెలిసింది ఏమిటంటే మనిషి తౌబా చేసుకుంటాడు హాకిం వద్దకు రాకముందు. అలాంటప్పుడు అల్హందులిల్లాహ్ అతని విషయం, అతని మధ్యలో అల్లాహ్ మధ్యలోనే ఉంటుంది. కానీ ఎవరైతే జడ్జ్, ఎవరైతే అధికారి ఉంటాడో, అతని వద్దకు వచ్చిన తర్వాత సిఫారసు చెల్లదు. మరియు అతనికి ఏదైతే శిక్ష పడినదో వాస్తవంగా అతను ఒకవేళ తౌబా కూడా చేసుకున్నాడు, తన మనసును కూడా శుభ్రపరుచుకున్నాడు, ఇలాంటి చెడ్డ గుణాన్ని పూర్తిగా వదిలేశాడు అంటే ఒక గొప్ప లాభం ఏమిటో తెలుసా? పరలోక శిక్ష అనేది అతనికి ఉండదు. ఇంతకుముందు నేను మీకు ఒక హదీస్ వినిపించాను. సహీ బుఖారీలో హదీస్ నెంబర్ 18, సహీ ముస్లిం హదీస్ నెంబర్ 1709. ఉబాదా బిన్ సామిత్ రదియల్లాహు అన్హు ఉల్లేఖించినది. అయితే ఆ హదీస్ లోనే వస్తుంది.
وَمَنْ أَصَابَ مِنْ ذَلِكَ شَيْئًا فَعُوقِبَ فِي الدُّنْيَا فَهُوَ كَفَّارَةٌ لَهُ (వమన్ అసాబ మిన్ దాలిక షైఅన్, ఫఊకిబ ఫిద్దున్యా, ఫహువ కఫ్ఫారతుల్లహ్) ఎవరైతే ఈ పాపాల్లో ఏదైనా ఒక పాపానికి గురవుతాడో, దాని యొక్క శిక్ష ఈ లోకంలో పొందుతాడో, ఇది అతని కొరకు కఫ్ఫారా అయిపోతుంది.
ముగింపు మరియు హెచ్చరికలు
సోదర మహాశయులారా, దొంగతనం చేసిన వ్యక్తి యొక్క చేయి నరికి వేసే విషయం ఏదైతే ఉందో, అది వ్యక్తిగతంగా కాదు. ఈ విషయం ముందు గుర్తుంచుకోవాలి. అంటే నా సొమ్ము ఎవరైనా దొంగతనం చేశాడు, నాకు తెలిసింది. నేను వెళ్లి అతని యొక్క చేయి నరకడం ఇది కాదు. ఇలాంటి శిక్షలు అనేటివి ఇస్లామీయ ప్రభుత్వం, ఇస్లామీయ ఖలీఫా మరియు నాయకులు ఎవరికైతే అధికారం ఇచ్చి ఉన్నాడో కోర్టులలో, ఇస్లామీయ అదాలతులలో ఏ జడ్జిలను నిర్ణయించాడో, అలాంటి వారు మాత్రమే చేయగలుగుతారు. ఈ విషయాన్ని ముందు గ్రహించాలి. లేదా అంటే హత్యకు బదులుగా హత్య, దొంగతనం చేసేదానికి బదులుగా శిక్ష, వ్యభిచారం చేసిన వారికి శిక్ష, ఇలాంటివి కొందరు ఏమంటారు? ఇస్లాంలో ఉన్నాయి కదా, నా చెల్లెలును వాడు, అతను అత్యాచారం చేశాడు అని, ఫలానా వారిపై అత్యాచారం చేశాడు అని వెంటనే ఎవరైనా వెళ్లి అతన్ని చంపడం, అతనికి ఏదైనా శిక్ష ఇవ్వడం, ఇది సరైన విషయం కాదు.
ఇక్కడ తెలుసుకోవాల్సిన మరో విషయం ఏమిటంటే, ఎంత పరిమాణంలో దొంగతనం చేస్తే చేతులు నరికి వేయబడతాయి? దీని గురించి చాలా వివరాలు ఉన్నాయి. ఆ వివరాల్లోకి ఇప్పుడు నేను వెళ్ళలేను. ఎందుకంటే ఇక్కడ నా ఉద్దేశం ఈరోజు దొంగతనం ఎంత చెడ్డ గుణం, దీన్ని వదులుకోవాలి అన్నటువంటి హెచ్చరిక ఇవ్వడం. మరియు ఎంత దొంగతనం చేస్తే ఎంత, ముందు ఏ చెయ్యి, చెయ్యిలో ఎంతవరకు?. కానీ ఇందులో కొన్ని కండిషన్స్ లు ఉన్నాయి.
ఇక్కడ తెలుసుకోవాల్సిన మరొక విషయం ఏమిటంటే, ఏ వ్యక్తి నుండి సామాను దొంగలించబడినదో, అతడు తన ఒక సొమ్ము దొంగలించబడినది అని ఆ దొంగతనం కంటే ఎక్కువ పరిమాణంలో వేరే ఏదైనా అత్యాచారం, దౌర్జన్యం లాంటివి చేసే ప్రయత్నం ఎంత మాత్రం చేయకూడదు. తన హక్కు ఏదైతే దొంగలించబడినదో దాన్ని పొందడానికి ధర్మ హద్దుల్లో ఉండి అంతకంటే ఘోరమైన పాపానికి పాల్పడకూడదు. ఈ రోజుల్లో కొందరు ఏం చేస్తారు? తన సైకిల్ మోటార్ ఏదైనా దొంగలించబడింది. తను నిలబెట్టి పోయాడు కార్, పార్కింగ్ చేసి వెళ్ళాడు. ఎవరైనా దాన్ని కొట్టి వెళ్లారు అంటే చూడడు, వెతకడు, రీసెర్చ్ చేయడు. అధికారులకు ఏదైనా మెసేజ్ ఇవ్వాలి, వారికి తెలపాలి, అలాంటిది ఏమీ చేయకుండా ఆ రోడ్డు మీద ఉన్న బండ్లన్నిటిని కూడా నాశనం చేయడం, అన్నింటిని కూడా తగలబెట్టడం, ఇంకా ఇలాంటి కొన్ని పనులు ఏదైతే చేస్తారో, ఇది సరైన విషయం కాదు. ఇలాంటి వాటికి మనం చాలా దూరం ఉండాలి.
ఈ సందర్భంలో ప్రవక్త సల్లల్లాహు అలైహి వసల్లం వారి ఒక హదీస్ మనం గుర్తుంచుకుంటే మన విశ్వాసం పెరుగుతుంది మరియు మనకు చాలా సంతోషం కలుగుతుంది. అదేమిటి? ప్రవక్త సల్లల్లాహు అలైహి వసల్లం ఒక సందర్భంలో చెప్పారు. ముస్లిం షరీఫ్ లోని హదీస్.
ఏ ముస్లిం అయినా ఒక మొక్కను నాటితే, దాని నుండి తినబడినది అతనికి సదకా (దానం) అవుతుంది, దాని నుండి దొంగలించబడినది అతనికి సదకా అవుతుంది, దాని నుండి క్రూరమృగం తిన్నది అతనికి సదకా అవుతుంది, పక్షి తిన్నది అతనికి సదకా అవుతుంది. ఎవరైనా దానిని తీసుకున్నా అది అతనికి సదకా అవుతుంది.
ఏ ముస్లిం అయినా ఒక ఏదైనా చెట్టు నాటాడు, ఇక ఆ చెట్టులో నుండి ఏ కొంచెం తినబడిన, లేక దొంగలించబడిన, లేదా ఆ మృగ జంతువులు వచ్చి వాటిని నాశనం చేసిన, లేక పక్షులు వచ్చి తిన్నా ఇదంతా కూడా ఒక్కొక్క విషయం చెబుతూ ప్రవక్త చెప్పారు. لَهُ صَدَقَةٌ (లహు సదకా) ఇది అతని కొరకు ఒక పుణ్యంగా రాయబడుతుంది. ఇది అతని కొరకు ఒక సదకాగా పరిగణించబడుతుంది.
అయితే మనకు దాని యొక్క ప్రతిఫలం అల్లాహ్ వద్ద లభిస్తుంది. అల్లాహ్ వద్ద ప్రతిఫలం లభిస్తుంది. ధర్మ పరిధిలో ఉండి మనం ఓపిక సహనాలు వహించాలి. హక్కు తీసుకోవడానికి కూడా ఇస్లాం అనుమతిస్తుంది. కానీ ధర్మ హద్దులో ఉండి మాత్రమే ఇలా చేయాలి.
ఇక దొంగతనం అన్నది సోదర మహాశయులారా, ఏదైనా ఒక సామాను వరకే పరిమితం ఉండదు. కొన్ని ఉదాహరణలు వచ్చేసాయి మీ ముందు. భూములు దొంగతనం చేయడం జరుగుతుంది. దొంగతనంలోని రూపాల్లో ఈ రోజుల్లో ఆన్లైన్ గా దొంగతనం, సోషల్ మీడియాలో దొంగతనాలు, ఎలక్ట్రానిక్ పరంగా దొంగతనాలు, ఇంకా పాస్వర్డ్లు అన్ని తెలుసుకొని ఏదైనా ఆ తప్పు లింకులు పంపి దాని ద్వారా ఒకరి అకౌంట్లో నుండి ఏదైనా లాక్కోవడం. దొంగతనానికి ఏ రూపు ఉన్నా కానీ. దొంగతనంలో ఈ రోజు కొందరు ఏం చేస్తారు? ఉదాహరణకు ఒక వ్యక్తి ఏదైనా పుస్తకం రాశాడు అంటే అతని పేరు తీసేసి మొత్తం తన పేరు పెట్టుకొని తాను రాసినట్లుగా చెప్పుకోవడం. ఇలా దొంగతనంలోని ఏ ఏ రూపం ఉన్నా గానీ ప్రతి ఒక్కటి దొంగతనంలో వస్తుంది, చెడ్డ గుణం, ప్రతి రకమైన దొంగతనం నుండి మనం దూరం ఉండాలి.
అల్లాహ్ మనందరికీ ఇలాంటి చెడు అలవాట్ల నుండి, చెడు గుణాల నుండి దూరం ఉంచుగాక. దీని యొక్క నష్టాలు, దీని యొక్క ఆ వినాశకరాలు ఏమైతే ఉన్నాయో ఖురాన్ హదీస్ ఆధారంగా మీరు విన్నారు. వీటిని ఇతరులకు తెలియజేయండి, సమాజాన్ని పవిత్ర పరిచే ప్రయత్నం చేయండి. అల్లాహ్ మనందరికీ సద్భాగ్యం ప్రసాదించుగాక. ఆమీన్. వా ఆఖిరు దావాన అనిల్ హందులిల్లాహి రబ్బిల్ ఆలమీన్. వస్సలాము అలైకుం వరహ్మతుల్లాహి వబరకాతుహ్.
దీన్ని షేర్ చెయ్యండి మీ బంధుమిత్రులతో , బారకల్లాహు ఫీకుమ్: “మంచికి మార్గనిర్దేశం చేసేవారికి దానిని ఆచరించిన వారితో సమానమైన పుణ్యం లభిస్తుంది” [సహీహ్ ముస్లిం, 3వ భాగం, నం .4665] ఈ క్రింది లింక్ దర్శించి మీ స్నేహితులు మరియు బంధువులు మా వాట్సాప్ గ్రూపులో చేరవచ్చు: teluguislam.net/whatsapp/. మా టెలిగ్రామ్ ఛానల్ https://t.me/teluguislam .మా యూట్యూబ్ ఛానల్: youtube.com/c/teluguislam . జిక్ర్ & దుఆల కోసం కొత్త వెబ్సైటు: telugudua.net
![ఇస్లాం మెచ్చిన మహిళలు [పుస్తకం]
సంకలనం: మౌలానా ముహమ్మద్ తఖీయుద్దీన్(రహిమహుల్లాహ్)
అనువాదం: ఇఖ్బాల్ అహ్మద్
అల్ హఖ్ తెలుగు పబ్లికేషన్స్, హైదరాబాద్ -500059.](https://teluguislam.net/wp-content/uploads/2025/06/islam-mechina-mahilalu.jpg?w=713)
TeluguIslam.net 
You must be logged in to post a comment.