య’లము మాబైన అయదీహిం వమా ఖల్ ఫహుం | అల్లాహ్ (త’ఆలా) యొక్క జ్ఞానం | ఆయతుల్ కుర్సీ [వీడియో]

يَعْلَمُ مَا بَيْنَ أَيْدِيهِمْ وَمَا خَلْفَهُمْ وَلاَ يُحِيطُونَ بِشَيْءٍ مِّنْ عِلْمِهِ إِلاَّ بِمَا شَاء
య’లము మాబైన అయదీహిం వమా ఖల్ ఫహుం వలా యుహీతూన బిషయ్యిమ్మిన్ ఇల్మిహీ ఇల్లా బి మాషా
వారికి ముందు ఉన్న దానినీ, వెనుక ఉన్నదానిని కూడా ఆయన ఎరుగు. ఆయన కోరినది తప్ప ఆయనకున్న జ్ఞానంలోని ఏ విషయమూ వారి గ్రాహ్యపరిధిలోకి రాదు

ఆయతుల్ కుర్సీలోని يَعْلَمُ مَا بَيْنَ أَيْدِيهِمْ وَمَا خَلْفَهُمْ (యఅలము మా బైన ఐదీహిమ్ వమా ఖల్ఫహుమ్) మరియు وَلَا يُحِيطُونَ بِشَيْءٍ مِنْ عِلْمِهِ إِلَّا بِمَا شَاءَ (వలా యుహీతూన బిషైఇమ్ మిన్ ఇల్మిహీ ఇల్లా బిమా షా) అనే భాగాల యొక్క వ్యాఖ్యానం ఇక్కడ వివరించబడింది. అల్లాహ్ యొక్క జ్ఞానం సంపూర్ణమైనదని, గతం, వర్తమానం మరియు భవిష్యత్తులోని ప్రతి సూక్ష్మ విషయాన్ని ఆయన ఎరుగునని ఈ ప్రసంగం స్పష్టం చేస్తుంది. ఆయనకు తెలియనిది ఏదీ లేదు. ఈ సంపూర్ణ జ్ఞానం ఆయనకు మాత్రమే ఉంది కనుక, ఆరాధనకు అర్హుడు కూడా ఆయన మాత్రమే. ఈ విషయాన్ని స్పష్టం చేయడానికి, నిద్ర, మరపు వంటి మానవ బలహీనతలు ఉన్న ఒక పీర్ (గురువు) ఉదంతం ద్వారా షిర్క్ యొక్క ఘోరమైన తప్పిదాన్ని వివరించబడింది. ఇమామ్ ఇబ్ను కతీర్ మరియు ఇబ్ను జరీర్ వంటి వ్యాఖ్యాతల అభిప్రాయాలతో పాటు, అల్లాహ్ యొక్క అపారమైన జ్ఞానాన్ని వర్ణించే సూరతుల్ అన్ఆమ్ వంటి అనేక ఖురాన్ ఆయతులు కూడా ఉదహరించబడ్డాయి. ఆరాధనను కేవలం సర్వజ్ఞాని అయిన అల్లాహ్ కు మాత్రమే ప్రత్యేకం చేయాలని ఈ ప్రసంగం నొక్కి చెబుతుంది.

అల్లాహు తాలా చెప్పాడు:

يَعْلَمُ مَا بَيْنَ أَيْدِيهِمْ وَمَا خَلْفَهُمْ
[యఅలము మా బైన ఐదీహిమ్ వమా ఖల్ఫహుమ్]
వారి ముందు వారి వెనక ఉన్నదంతా కూడా అల్లాహ్ కు చాలా మంచిగా తెలుసు.

وَلَا يُحِيطُونَ بِشَيْءٍ مِنْ عِلْمِهِ إِلَّا بِمَا شَاءَ
[వలా యుహీతూన బిషైఇమ్ మిన్ ఇల్మిహీ ఇల్లా బిమా షా]
కానీ అతని యొక్క జ్ఞానంలో అల్లాహ్ కు సంబంధించిన జ్ఞానం గురించి వారికి ఏమీ తెలియదు, కేవలం అల్లాహ్ వారికి తెలుపాలని కోరినంత తప్ప.

చూడండి, మొదటి విషయం, మొదటి భాగంలో మనం విన్న ఈ తఫ్సీర్ యొక్క వ్యాఖ్యాన విషయాలు మరిచిపోకూడదు. వాటితో సంబంధం ఉంది ప్రతి ఒక్క భాగానికి. అల్లాహ్ మాత్రమే సత్య ఆరాధ్యనీయుడు అన్నదానికి అల్లాహు తాలా నిదర్శనాలు చూపిస్తున్నాడు అనగా, వాటిలో ఒకటి ఏమిటి? ఇది కూడా. ఆయన యొక్క జ్ఞానం సంపూర్ణ జ్ఞానం. భూతకాలంలో జరిగినది, వర్తమానంలో జరుగుతున్నది, భవిష్యత్తులో జరగబోయేది అన్నిటి గురించి కూడా చాలా సూక్ష్మంగా, వివరంగా, అన్ని కోణాల నుండి ఆయనకు తెలుసు. అలాంటి ఆ సంపూర్ణ జ్ఞానం ఈ విశ్వంలో ఎవరికీ లేదు. సంపూర్ణ జ్ఞానం ఉన్నవాడే నిజమైన ఆరాధ్యుడు కాగలుగుతాడు, వేరే ఎవరూ కూడా కాజాలరు.

చూడండి, నేను అడపాదడపా మన రోజువారీ జీవితంలో జరిగే కొన్ని సంఘటనలు ఒక ఉపమానంగా తెలియజేస్తూ ఉంటాను. ఎందుకు? తౌహీద్ విషయం, రిసాలత్ యొక్క విషయం, ఆఖిరత్ యొక్క విషయం మనకు చాలా మంచిగా అర్థం కావాలని. ఎవరైతే కలిమా లా ఇలాహ ఇల్లల్లాహ్ స్వీకరించలేదో, నోటితో పలకలేదో, మనస్సుతో ధ్రువీకరించలేదో, వారు ముస్లింలు కారు. ఈ విషయం మనకు స్పష్టంగా తెలుసు. వారిని కాఫిర్, ముష్రిక్ అనడం జరుగుతుంది. కానీ దురదృష్టవశాత్తు, కలిమా చదువుతూ, నమాజులు కూడా చేస్తూ, ఇంకా రిసాలత్, ఆఖిరత్ ఇవన్నిటినీ కూడా నమ్ముతూ, మన ముస్లింలలో ఎంతోమంది బాబాలను, దర్గాలను, పీర్లను, ముర్షద్ లను ఇంకా ఎవరెవరినో ఎంత నమ్ముతున్నారంటే వారు ఉన్నటువంటి ఆ భయంకరమైన షిర్క్ గురించి వారికి వారు తప్పు చేస్తున్నారు అన్నటువంటి ఏ కొంచెం కూడా భయం లేకపోయింది.

ఒక సంఘటన ద్వారా షిర్క్ యొక్క వివరణ

ఇలాంటి సందర్భంలో ఒక చిన్న సంఘటన. కొందరు దీనిని కల్పితమని అనుకుంటారేమో కావచ్చు. కానీ వాస్తవానికి మనలో ఎంతో మందికి ఒక గొప్ప గుణపాఠం ఇందులో ఉంది. అందుకొరకే నేను يَعْلَمُ مَا بَيْنَ أَيْدِيهِمْ وَمَا خَلْفَهُمْ [యఅలము మా బైన ఐదీహిమ్ వమా ఖల్ఫహుమ్] దీని యొక్క వ్యాఖ్యానంలో ఈ సంఘటనను పేర్కొంటున్నాను. శ్రద్ధగా వినండి.

ఎంతోమంది ఎందరో బాబాలను నమ్ముతారు. వెళ్లి వారికి సజ్దాలు చేస్తారు. వారి ముందు తమ యొక్క కష్టాలను, దుఃఖాలను తెలుపుకొని, వారి ద్వారా అవన్నీ దూరం అవుతాయని వారి యొక్క నమ్మకం. అయితే సంఘటన ఏమిటంటే, ఒక భక్తుని ఇంటికి ఒక మురీద్ ఇంటికి ఒక పీర్ సాబ్ వస్తాడు. ఆ మురీద్, ఆ భక్తుడు, నా ఇంట్లో ఈ రోజు ఆనందమే ఆనందం. నా యొక్క గురువు, నా యొక్క పీర్ సాబ్ ఇంటికి వచ్చాడు అని ఎన్నో రకాల సేవలు చేస్తాడు. ఆ మధ్యలో అతని పక్కన కూర్చొని తన యొక్క దుఃఖాలను, బాధలను చెప్పుకుంటూ ఉండగా అతడు, అతనికి కన్ను అంటుకుంటుంది. కొన్ని క్షణాల గురించి అలా నిద్రపోతాడు. మళ్లీ కొన్ని క్షణాల తర్వాత కళ్ళు తెరిచి, నిద్ర మత్తులో నుండి బయటికి వచ్చి మేల్కొని చూస్తాడు. భక్తుడు చెప్పుకుంటూనే పోతూ ఉన్నాడు. అప్పుడు అంటాడు, “నేను వింటూ వింటూ నాకు కొంచెం అలా నిద్ర వచ్చేసింది. ఈ మధ్యలో నీవు ఏమి చెప్పావు? మరోసారి చెప్పు.”

అయిపోయిందా సంఘటన? ఏమైనా అర్థమైందా మీకు? ఏ భక్తుడు అంటే ఇక్కడ వాస్తవానికి భక్తుడు కాదు, సర్వసామాన్యంగా జరుగుతుంది గనక ఈ పదం నేను కూడా వాడుతున్నాను మీకు అర్థం కావాలని. ఈ శిష్యుడు అనండి. ఇతను తన బాధలు ఏదైతే వెళ్లబుచ్చుతున్నాడో, కొన్ని క్షణాల గురించి అతనిలో ఉన్నటువంటి, అంటే ఆ పీర్ సాబ్, ఆ బాబా అతని యొక్క ఆ గురువులో ఉన్న ఆ లోపం కారణంగా ఈ మధ్యలో ఏం చెప్పాడో అతని యొక్క ఈ శిష్యుడు అతనికి తెలియలేదు.

ఎన్ని లోపాలు? అర్థమవుతుందా మీకు? ఒకటి నిద్రమత్తు. రెండవది నిద్రలో అతడు ఏం చెప్పాడో వినలేకపోయాడు. ఈ మధ్యలో అతను చెప్పిన బాధ ఇతనికి తెలియలేకపోయింది. ఎవరైతే సరిగా వినలేడో, ఎవరికైతే తన దాసుల గురించి, తన శిష్యుల గురించి, తన భక్తుల గురించి సరియైన జ్ఞానం కలిగి లేడో, ఎవరికైతే కొంతసేపటి గురించి నిద్రమత్తులోకి వెళ్లి ఏం జరుగుతుందో తెలియడం లేదో, అలాంటి వారిని ఆరాధించడం, పూజించడం, ఆరాధనకు సంబంధించిన ఏ కొంత భాగమైనా అతని ముందు మనం పాటించడం, మన కష్టబాధాలు వారే తొలగిస్తారన్నటువంటి కొందరు అయితే ఏమనుకుంటారు? వారి ద్వారా తొలగించబడతాయని. కానీ మరీ ఎంతోమంది ఉన్నారు, వారే మా యొక్క కష్టాలను దూరం చేస్తారని. ఇది ఎంతటి ఘోరమైన షిర్క్ లో పడుతున్నారో అర్థమవుతుందా?

అయితే అల్లాహు తాలా గురించి ఇక్కడ ఇంత స్పష్టంగా చెప్పడం జరిగింది, వాస్తవ ఆరాధ్యుడు, మీ ఆరాధనలకు నిజమైన అర్హుడు ఎవరు కాగలుగుతారంటే ఎవరికైతే సంపూర్ణ జ్ఞానం ఉందో, ఈ సంపూర్ణ జ్ఞానం అన్నది ఈ లోకంలో కేవలం ఒకే ఒక్కనికి ఉంది, ఆయనే ఎవరు? ఆ సృష్టికర్త అయిన అల్లాహ్.

ఈ ఆయత్ వ్యాఖ్యానంలో ఇమామ్ ఇబ్ను కతీర్ రహమహుల్లాహ్ తెలిపారు: دليل على إحاطة علمه بجميع الكائنات [దలలీలున్ అలా ఇహాతతి ఇల్మిహీ బిజమీయిల్ కాఇనాత్]. يَعْلَمُ مَا بَيْنَ أَيْدِيهِمْ وَمَا خَلْفَهُمْ [యఅలము మా బైన ఐదీహిమ్ వమా ఖల్ఫహుమ్] ఈ పదం ఇది ఒక గొప్ప దలీల్. ఈ పూర్తి వ్యవస్థలో, విశ్వంలో, ఈ సంపూర్ణ మొత్తం ఈ ప్రపంచంలో ماضيها وحاضرها ومستقبلها [మాదీహా వ హాదిరిహా వ ముస్తక్బలిహా] భూతకాలం, వర్తమానం, భవిష్యత్తు అన్నిటి గురించి సంపూర్ణంగా తెలిసినవాడు కేవలం అల్లాహ్ ఒకే ఒక్కడు.

ఇమామ్ ఇబ్ను జరీర్ అతబరీ రహమహుల్లాహ్, ముఫస్సిరీన్ లలో, వ్యాఖ్యానకర్తలలో చాలా ప్రథమ అంశంలో వీరిని లెక్కించడం జరుగుతుంది. إنما يعني بذلك أن العبادة لا تنبغي لمن كان بالأشياء جاهلا [ఇన్నమా యఅనీ బి దాలిక అన్నల్ ఇబాదత లా తంబగీ లిమన్ కాన బిల్ అశ్యాయి జాహిలా]. ఇబాదత్, ఆరాధన అతనికి చేయడం ఎవరికైతే, ఎవరైతే అతని చుట్టుపక్కల విషయాల నుండి అజ్ఞానంగా ఉన్నాడో అలాంటి వారి యొక్క ఆరాధన ఎలా చేయడం జరుగుతుంది? మరియు فكيف يعبد من لا يعقل شيئا البتة من وثن وصنم [ఫకైఫ యుఅబదు మల్ లా యఅఖిలు షైఅన్ అల్బత్తత మిన్ వసనిన్ వ సనమ్]. బుద్ధి జ్ఞానాలు పేరుకు మాత్రం లేనటువంటి విగ్రహాలను, తమ చేతులతో చేసుకున్నటువంటి విషయాలను ఆరాధించడం ఇది ఎలా సమంజసం అవుతుంది? అందుకొరకే దీని ద్వారా అల్లాహ్ తెలుపుతున్న విషయం ఏమిటంటే, فأخلصوا العبادة لمن هو محيط بالأشياء كلها، يعلمها، لا يخفى عليه صغيرها وكبيرها [ఫ అఖ్లిసూల్ ఇబాదత లిమన్ హువ ముహీతున్ బిల్ అశ్యాయి కుల్లిహా, యఅలముహా, లా యఖ్ఫా అలైహి సగీరుహా వ కబీరుహా]. కనుక మీరు ఆరాధనను ప్రత్యేకంగా కేవలం అతని కొరకు చేయండి, ఎవరైతే అన్ని విషయాల గురించి సంపూర్ణ జ్ఞానం కలిగి ఉన్నాడో, ఎంతటి సంపూర్ణ జ్ఞానం? لا يخفى عليه صغيرها وكبيرها [లా యఖ్ఫా అలైహి సగీరుహా వ కబీరుహా]. అతని ముందు వారి ఏ విషయం కూడా అది చిన్నదైనా, పెద్దదైనా మరుగుగా ఉండదు.

అందుకొరకే మనం చూస్తున్నాము అల్లాహ్ యొక్క పేర్లలో ఒక పేరు, గొప్ప పేరు ఏమిటి? عليم [అలీమ్]. అబ్దుల్ అలీమ్ అని మనం పేరు వింటూ ఉంటాము కదా? అలీమ్ యొక్క దాసుడు. అలీమ్ ఈ పదం ఖురాన్ లో 150 కంటే ఎక్కువ సందర్భాలలో అల్లాహ్ రబ్బుల్ ఆలమీన్ పేర్కొన్నాడు. ఇంకా ఈ ‘ఇల్మ్’ కు సంబంధించిన వేరే పదాలు, వేరే ఫార్మేట్, సీగాలలో అనేక సందర్భాలలో వచ్చింది. అయితే ఇక్కడ నేను కేవలం సూరతుల్ అన్ఆమ్, ఆయత్ నెంబర్ 59 ప్రస్తావించి, వేరే కొన్ని ఆయతుల భావాన్ని తెలియజేసి ఇంక ముందుకు సాగుతాను. శ్రద్ధ వహించండి.

ఖురాన్ ఆయతుల ద్వారా అల్లాహ్ యొక్క అపారమైన జ్ఞానం

ఈ ఆయత్ నెంబర్ 59 సూరతుల్ అన్ఆమ్, సూర నెంబర్ 6 లో అల్లాహ్ ఏమంటున్నాడో చూడండి:

وَعِنْدَهُ مَفَاتِحُ الْغَيْبِ لَا يَعْلَمُهَا إِلَّا هُوَ
[వ ఇందహూ మఫాతిహుల్ గైబ్ లా యఅలముహా ఇల్లా హువ]
ఆయన వద్దే, అంటే అల్లాహ్ వద్దనే అగోచర జ్ఞానాల తాళములు ఉన్నాయి. لا يعلمها إلا هو [లా యఅలముహా ఇల్లా హువ] ఆయన తప్ప వేరే ఎవరికీ వాటి గురించి తెలియదు. చూడండి ఎంత స్పష్టంగా ఉంది. గైబ్ కా ఇల్మ్, అగోచర జ్ఞానం సంపూర్ణ రీతిలో అల్లాహ్ తప్ప ఇంకా ఎవరికీ లేదు.

ఇక అల్లాహు తాలా యొక్క ఆ జ్ఞానం ఏ ఏ విషయాల గురించి? కొన్ని వివరాలు అల్లాహు తాలా ఇక్కడ తెలియజేస్తున్నాడు వెంటనే: وَيَعْلَمُ مَا فِي الْبَرِّ وَالْبَحْرِ [వ యఅలము మా ఫిల్ బర్రి వల్ బహర్]. అల్లాహ్ కు చాలా మంచిగా తెలుసు, మా ఫిల్ బర్ర్, ఎడారి ప్రాంతంలో గాని, వల్ బహర్, సముద్రాలలో గాని. అంటే ఇక్కడ నీటి ప్రదేశమైనా, నీరు లేని ప్రదేశమైనా. భూమిపై మరియు సముద్రాలపై అన్నిటి గురించి. అంతేకాదు, وَمَا تَسْقُطُ مِنْ وَرَقَةٍ إِلَّا يَعْلَمُهَا [వమా తస్ఖుతు మిన్ వరఖతిన్ ఇల్లా యఅలముహా]. ఏదైనా చెట్టు నుండి ఒక్క ఆకు రాలి పడుతుందంటే దాని గురించి కూడా అల్లాహ్ కు సంపూర్ణ జ్ఞానం ఉంది. وَلَا حَبَّةٍ فِي ظُلُمَاتِ الْأَرْضِ [వలా హబ్బతిన్ ఫీ దులుమాతిల్ అర్ద్]. అంతేకాదు, భూమి యొక్క లోపట, చీకట్లో ఒక విత్తనం, అల్లాహు అక్బర్, ఒక విత్తనం ఏదైతే వేయబడుతుందో దానిని, దానికి సంబంధించిన అన్ని వివరాలు, అది ఎప్పుడు పగులుతుంది, అందులో నుండి ఎప్పుడు మొలక ఎత్తుతుంది దీనికి సంబంధించిన అన్ని వివరాలు కేవలం అల్లాహ్ కు మాత్రమే తెలుసు.

ఇంకా وَلَا رَطْبٍ وَلَا يَابِسٍ [వలా రత్బిన్ వలా యాబిసిన్]. పచ్చిది అయినా, ఎండినది అయినా, ఏది గాని. ఈ పచ్చిది మరియు ఎండినది పంట విషయాలలో కావచ్చు, వేరే ఎన్నో విషయాలలో కావచ్చు. ప్రతి దాని గురించి అల్లాహ్ కు సంపూర్ణ జ్ఞానం గలదు. إِلَّا فِي كِتَابٍ مُبِينٍ [ఇల్లా ఫీ కితాబిమ్ ముబీన్]. ఇవన్నిటినీ కూడా అల్లాహు తాలా లౌహె మహ్ఫూజ్, ఎంతో సురక్షితంగా ఉన్నటువంటి అతని వద్ద ఉన్న ఆ గ్రంథంలో రాసి పెట్టాడు కూడా.

సోదర మహాశయులారా, గమనించండి ఇంతటి సూక్ష్మ జ్ఞానం గల ఆ అల్లాహు తాలా, నేను చెప్తున్నాను కదా ‘ఇల్మ్’, దీనికి సంబంధించిన వేరే ఫార్మేట్ లలో ఖురాన్ లో వచ్చిన ఆయతులను మనం చూసుకుంటూ వెళ్తే చాలా చాలా ఉన్నాయి, చాలా ఉన్నాయి. لا يعزب عنه مثقال ذرة [లా యఅజుబు అన్హు మిస్ఖాలు దర్రహ్]. అణువంత, అణువుకు సమానమైన ఏ వస్తువు గాని, విషయం గాని అతనికి తెలియకుండా లేదు. واعلموا أن الله يعلم ما في أنفسكم [వఅలమూ అన్నల్లాహ యఅలము మా ఫీ అన్ఫుసికుమ్] మీ హృదయాలలో ఉన్నది కూడా అల్లాహ్ కు చాలా సూక్ష్మంగా తెలుసు.

సూరత్ ఖాఫ్ లో గమనిస్తున్నారా మీరు?

ولقد خلقنا الإنسان ونعلم ما توسوس به نفسه
[వలఖద్ ఖలఖ్నల్ ఇన్సాన్ వ నఅలము మా తువస్విసు బిహీ నఫ్సుహ్].
మనిషిని మేమే పుట్టించాము, ونعلم ما توسوس به نفسه [వ నఅలము మా తువస్విసు బిహీ నఫ్సుహ్] అతని యొక్క ఆలోచనలలో, అతని యొక్క ఊహ గానాలలో ఏది మెదులుతుంది, కదులుతుంది, అతడు ఏం ఆలోచిస్తున్నాడు, ఏం ఊహిస్తున్నాడు అది కూడా మాకు చాలా సూక్ష్మంగా, చాలా మంచి వివరంగా తెలుసు.

సూరతుర్రఅద్ లో ప్రతి స్త్రీ, స్త్రీ అంటే ఇక్కడ కేవలం మనిషియే కాదు, సర్వ సృష్టిలో స్త్రీ లింగం, పురుష లింగం అని అంటాము కదా, జంతువులలో కూడా ప్రతిదీ. يعلم الله، الله يعلم ما تحمل كل أنثى [అల్లాహు యఅలము మా తహ్మిలు కుల్లు ఉన్సా]. అల్లాహ్ కు మాత్రమే తెలుసు, ما تحمل كل أنثى [మా తహ్మిలు కుల్లు ఉన్సా]. ఎవరి గర్భాశయాలలో ఏమి పెరుగుతుంది, తరుగుతుంది, ఏ స్త్రీ ఏమి గర్భం దాల్చుతుంది, ఇదంతా కూడా అల్లాహ్ కు చాలా స్పష్టంగా తెలుసు. عالم الغيب والشهادة [ఆలిముల్ గైబి వష్షహాదహ్]. అన్నీ అతని ముందు చాలా స్పష్టం. గోచరము, అగోచరము, అన్ని రకాల జ్ఞానం గలవాడు. ألم يعلموا أن الله يعلم سرهم ونجواهم [అలమ్ యఅలమూ అన్నల్లాహ యఅలము సిర్రహుమ్ వ నజ్వాహుమ్] వారు ఏదైతే గుప్తంగా ఉంచుతున్నారో, వారు ఏ గుసగుసలాడుకుంటున్నారో దాని గురించి కూడా అల్లాహ్ కు తెలుసు.

ప్రియులారా, ఈ విధంగా నేను ఆయతులు వినిపించుకుంటూ పోతే చాలా ఆయతులు ఉన్నాయి. చెప్పే ఉద్దేశాన్ని గమనిస్తే, బుద్ధిమంతునికి ఒక్క చిన్న సైగ కూడా సరిపోతుంది. అదేంటి? ఇలాంటి సంపూర్ణ జ్ఞానం గల అల్లాహ్ మాత్రమే నిజమైన ఆరాధ్యుడు. ఇలాంటి అల్లాహ్ ను వదిలి, ఇంకా వేరే ఎవరెవరినైతే పూజిస్తున్నారో, ఎవరెవరినైతే ఆరాధిస్తున్నారో అదంతా కూడా వ్యర్థము, తప్పు. దానికి ఎలాంటి ఆధారము వారి వద్ద లేదు. అందుకొరకు అల్లాహ్ ను తప్ప ఇంకా వేరే ఎవరినీ కూడా ఆరాధించరాదు.

—

అల్లాహ్ (త’ఆలా)
https://teluguislam.net/allah/

తఫ్సీర్ ఆయతుల్ కుర్సీ – అల్లాహ్ యొక్క నామాలు & గుణగణాలు – యూట్యూబ్ ప్లే లిస్ట్
https://www.youtube.com/playlist?list=PLw5IiDSnUeV3zZ7VizbWTYAi6VApCjfk3